اسلام آباد پولیس نے قلیل وقت میں رمشا کالونی میں تہرے قتل میں ملوث ملزمان کو گرفتارکر لیا، ڈی آئی جی اسلام آباد

پیر 15 ستمبر 2025 19:25

اسلام آباد (اُردو پوائنٹ اخبارتازہ ترین - اے پی پی۔ 15 ستمبر2025ء) ڈی آئی جی اسلام آباد محمد جواد طارق نے کہا ہے کہ اسلام آباد پولیس کی ٹیموں نے قلیل وقت میں رمشا کالونی تہرے قتل کیس میں ملوث دو ملزمان کو گرفتارکر لیا، گرفتار ملزمان نے مقتولین کو نشہ آور گولیاں جوس میں ملا کر بے رحمی سے قتل کیا اور ان کے موبائل فون لے کر فرار ہو گئے تھے۔ پولیس ترجمان کے مطابق ڈپٹی انسپکٹر جنرل آف پولیس اسلام آباد محمد جواد طارق نے ریسکیو-15 پر پریس کانفرنس کی۔

اس موقع پر ایس ایس پی آپریشنز محمد شعیب خان ،ایس پی سٹی اور دیگر سینئر پولیس افسران موجود تھے ۔ ڈی آئی جی اسلام آباد نے بتا یا کہ وفاقی دارالحکومت اسلام آبادکے تھانہ انڈسٹریل ایریا کے علاقے رمشا کالونی میں تین افراد کے اندوہناک قتل کا معمہ اسلام آباد پولیس قلیل وقت میں کامیابی سے حل کر لیا۔

(جاری ہے)

انہوں نے مزید بتایا کہ ملزمان نے محمد اکرام، ان کے بیٹے عمانوئیل اور بیٹی زویہ کو نشہ آور گولیاں جوس میں ملا کر بے رحمی سے قتل کیا اور مقتولین کے موبائل فون لے کر موقع سے فرار ہوگئے،وقوعہ کی اطلاع موصول ہوتے ہی مقامی پولیس ٹیموں اور سینئر پولیس افسران نے موقع پر پہنچ کر ڈیڈ باڈیز کو ہسپتال منتقل کروایا ،موقع ملاحظہ کیا اور اس وقوعہ کا مقدمہ درج کیا۔

انہوں نے کہا کہ ملزمان کی گرفتار ی کے لئے ایس ایس پی انویسٹی گیشن کی سربراہی میں انچارج آر ڈی یو ، ایس ایچ او تھانہ انڈسٹریل ایریا معہ دیگر افسران پر مشتمل خصوصی پولیس ٹیم تشکیل دی ، پولیس ٹیم نے تمام تکنیکی اور انسانی ذرائع استعمال کرتے ہوئے اس سنگین نوعیت کے وقوعہ میں ملوث دوملزمان کو قلیل وقت میں ٹریس کرکے گرفتار کر لیا، گرفتار ملزمان کی شناخت یشوا ولد بہادر اور یشوا ولد رمضان کے ناموں سے ہوئی ہے،پولیس ٹیموں نے سیف سٹی کیمروں، تکنیکی ذرائع اور جدید تفتیشی طریقوں سے ملزمان کو ٹریس کر کے گرفتار کیا۔

انہوں نے مزید کہا کہ گرفتار ملزمان کے خلاف ٹھوس شواہد کی روشنی میں مقدمہ مکمل کر کے انہیں عدالت میں چالان کیا جائے گا اور قرار واقعی سزا دلوائی جائے گی،اسلام آباد پولیس شہریوں کے جان و مال کے تحفظ کے لئے ہمہ وقت چوکس اور پرعزم ہے۔