پاکستان آسیان کا اہم تجارتی پارٹنر قرار، ملائیشیا کی صدارت پاکستان کے لیے نئے تجارتی مواقع لائے گی، ہرمن ہردیناتا

کراچی (اُردو پوائنٹ اخبارتازہ ترین - این این آئی۔ 16 ستمبر2025ء) پاکستان اور ملائیشیا کے درمیان دیرینہ دوستی اور اعتماد کو مضبوط کرتے ہوئے پاکستان ملائیشیا فرینڈشپ ایسوسی ایشن (پی ایم ایف ای) نے چوتھی ایوارڈز تقریب کا انعقاد کیا جس میں دونوں ممالک کے تعلقات کی اقتصادی وسعت پر زور دیا گیا۔تقریب وفاقی وزیر صحت سید مصطفیٰ کمال، صدر پی ایم ایف اے شاہد جاوید قریشی، ملائیشیا کے قونصل جنرل کراچی ہرمن ہردیناتا احمد، چیئرمین تواب گروپ خالد تواب، میپاک ایڈیبل آئل کے سی ای او عبدالرشید جان محمد اور دیگر ممتاز شخصیات نے شرکت کی۔

وفاقی وزیر صحت سید مصطفی کمال نے خطاب کرتے ہوئے پاکستان اور ملائیشیا کے درمیان تجارتی روابط کو مزید بڑھانے کی ضرورت پر زور دیا۔انہوں نے پی ایم ایف اے کی تجارتی روابط کو فروغ دینے کی کاوشوں کو سراہتے ہوئے کہا کہ یہ تعاون تجارت و سرمایہ کاری کی نئی راہیں کھول سکتا ہے۔

(جاری ہے)

پاکستان ملائیشیا فرینڈشپ ایسوسی ایشن کے صدر شاہد جاوید قریشی نے مہمانوں کا خیرمقدم کرتے ہوئے کہا کہ پاکستان اور ملائیشیا کے مابین دوطرفہ تجارتی حجم اب تقریباً 1.5 ارب ڈالر تک پہنچ چکا ہے جس میں پاکستان کی برآمدات میں چاول، کپڑے، دواسازی اور سمندری خوراک شامل ہیں جبکہ ملائیشیا سے درآمدات میں پام آئل، مشینری اور کیمیکلز سرِ فہرست ہیں۔

انہوں نے دونوں ملکوں کی حکومتوں سے کہا کہ فری ٹریڈ ایگریمنٹ کا دوبارہ جائزہ لیا جائے تاکہ پاکستانی مصنوعات کو منصفانہ مارکیٹ تک رسائی حاصل ہو۔ملائیشیا کے قونصل جنرل کراچی ہرمن ہردیناتا احمد نے پی ایم ایف اے کی تجارتی روابط کو بڑھانے میں کردار کو سراہتے ہوئے کہا کہ ملائیشیا کی آسیان کی صدارت پاکستان کے لیے نئے تجارتی مواقع لے کر آئے گی۔

انہوں نے پاکستان کو آسیان کا ایک اہم تجارتی شراکت دار قرار دیا۔تقریب میں سابق وزیر اعظم ملائیشیا ڈاکٹر مہاتیر محمد کو بھی خراج تحسین پیش کیا گیا جنہوں نے پی ایم ایف اے ایوارڈز تقریب کے لیے خصوصی وڈیو پیغام بھیجا جبکہ پاکستان کے مسلح افواج کوآپریشن بنیان مرصوص کے بہادری بھرے کارنامے پر زبردست خراج تحسین بھی پیش کیا گیا۔تقریب میں مختلف شعبوں میں نمایاں خدمات انجام دینے والی شخصیات ڈائریکٹر بلک مینجمنٹ (رائس پراجیکٹ) عبدالرشید جان محمد، سی ای او ڈوسانی انٹرپرائزز مختار حسین ڈوسانی، منیجنگ ڈائریکٹر ایمپائر گروپ آف کمپنیز محمد معیز انجر والا،ڈائریکٹر آپریشنز شہباز انٹرنیشنل انجینئر شہباز قریشی، چیئرمین پاکستان وناسپتی مینوفیکچررز ایسوسی ایشن شیخ عمر ریحان، سی ای او شرجیل اینڈ برادرز شرجیل گوپلانی اور ایئر ایشیا ایکس برہاڈ ملائیشیا کو ایوارڈز دیا گیا۔