آئی آر ایس اسلام آباد اور سی ایس ایس پی آر کے تعاون سے پہلگام کے بعد ڈیٹرنس اور کشیدگی کے تناظر میں تاریخی ترمیم شدہ کتاب کی تقریب رونمائی

اسلام آباد (اُردو پوائنٹ اخبارتازہ ترین - اے پی پی۔ 16 ستمبر2025ء) انسٹی ٹیوٹ آف ریجنل سٹڈیز (آئی آر ایس) اسلام آباد نے سینٹر فار سیکورٹی سٹرٹیجی اینڈ پالیسی ریسرچ (سی ایس ایس پی آر) کے تعاون سے "Strategic Reckoning: Perspectives on Deterrence and Escalation Post-Phalgam - مئی 2025" کے عنوان سے ایک تاریخی ترمیم شدہ کتاب کی تقریب رونمائی کی ہے۔منگل کو جاری پریس ریلیز میں کہا گیا ہے کہ اعلیٰ سطح کی تقریب میں سفارتکاروں، ماہرین، سکالرز، صحافیوں، سینئر حکام اور طلباء نے شرکت کی۔

مصنفہ ڈاکٹر رابعہ اختر کی طرف سے ترمیم کردہ جلد مئی 2025 کے بحران کا ایک جامع تجزیہ فراہم کرتی ہے جسے بڑے پیمانے پر جنوبی ایشیا میں کئی دہائیوں میں سب سے خطرناک تصادم کے طور پر جانا جاتا ہے، اس میں معاون ڈیٹرنس کی نزاکت، کمپریسڈ اسکیلیشن ٹائم لائنز سے لاحق خطرات اور تباہ کن نتائج کا جائزہ لیا گیا ہے۔

(جاری ہے)

آئی آر ایس-سی ایس ایس پی آر نے پہلگام واقعہ کے بعد ڈیٹرنس اینڈ اسکیلیشن پر تاریخی کتاب کا اجراء کیا ہے۔

کتاب اس بات کی نشاندہی کرتی ہے کہ کس طرح پاکستان نے شدید اشتعال انگیزیوں کے باوجود تحمل کا مظاہرہ کیا اور مزید کشیدگی کو روکنے کے لئے منظم ردعمل کا مظاہرہ کیا۔ صدر آئی آر ایس سفیر جوہر سلیم نے کہا کہ بھارت کی اپنے پڑوسیوں بشمول نیپال اور سری لنکا کے بارے میں جارحانہ پالیسیاں جنوبی ایشیا میں عدم استحکام کو ہوا دیتی ہیں اور سارک جیسے علاقائی اداروں کو کمزور کرتی ہیں جو کہ علاقائی تعاون اور خوشحالی کو فروغ دینے میں اہم کردار ادا کر سکتے ہیں لیکن بھارت کے عناد اور تسلط پسندانہ مقاصد کے باعث ایسا نہیں ہو سکا۔

انہوں نے خبردار کیا کہ ہندوستان کی سٹریٹجک غلبہ کی جستجو سے اس کے اپنے مفادات کو سفارتی تنہائی اور طویل مدتی دھچکا لگ سکتا ہے۔نیشنل کمانڈ اتھارٹی کے مشیر لیفٹیننٹ جنرل (ر) خالد احمد قدوائی نے پاکستان کی سہ فریقی تیاریوں، آپریشنل مہارت اور آرمی راکٹ فورس کمانڈ کے قیام کو قابل اعتماد ڈیٹرنس اقدام کے ثبوت کے طور پر اجاگر کیا۔انہوں نے ہندوستان کی فوجی کوتاہیوں، پاکستان کے نپے تلے ردعمل اور وسیع تر جغرافیائی سیاسی مضمرات پر روشنی ڈالی اور کہا کہ پاکستان نے مربوط سہ فریقی آپریشنز کے ذریعے کامیابی سے ڈیٹرنس اور سٹریٹجک توازن بحال کیا ہے۔

سابق صدر آزاد جموں و کشمیر سفیر مسعود خان نے پہلگام حملے کو ایک اہم فلیش پوائنٹ قرار دیتے ہوئے تنازعہ کشمیر کی علاقائی عدم استحکام کی پائیدار مرکزیت کو اجاگر کیا ۔ انہوں نے خبردار کیا کہ کشمیریوں کی شکایات کو نظر انداز کرنا بار بار آنے والے بحرانوں کو برقرار رکھے گا۔ مصنفہ ڈاکٹر رابعہ اختر نے مئی 2025 کے بحران کو ڈیٹرنس کے خطرناک عدم استحکام کے طور پر بیان کیا جہاں بھارت نے پیشگی حملوں کا ایک 'نیا معمول' نافذ کرنے کی کوشش کی۔

اس نے استدلال کیا کہ اس رویے کو ایک 'نئے غیر معمول' کے طور پر تسلیم کرنا چاہئے جو کہ جوہری حالات کے تحت قائم بحران کے انتظام کے طریقوں سے انحراف ہے۔انہوں نے پاکستان کی طرف سے جوابی کارروائی کو ذمہ دارانہ ڈیٹرنس کی مثال قرار دیا ۔سابق ڈی جی آرمز کنٹرول اور تخفیف اسلحہ ایس پی ڈی خالد بنوری نے پاک فضائیہ (پی اے ایف) کی کارکردگی کا تجزیہ پیش کیا جس میں اس کے تیزی سے متحرک ہونے، بھارتی حملوں کو بے اثر کرنے اور بروقت جوابی فضائی کارروائیوں کے ذریعے فضائی برتری کے مظاہرے کی تفصیل دی گئی۔

انہوں نے زور دے کر کہا کہ پی اے ایف کے نپے تلے لیکن پرعزم اقدامات نے بھارت کے مقاصد کو نقصان پہنچایا ۔قائداعظم یونیورسٹی کی ایسوسی ایٹ پروفیسر ڈاکٹر سلمیٰ ملک نے ہندوستان اور پاکستان سے باہر علاقائی شراکت داروں پر اس طرح کے بحرانوں کے منفی اثرات پر روشنی ڈالی اور اقتصادی رکاوٹوں، پناہ گزینوں کے بہاؤ اور سکیورٹی کے بڑھتے ہوئے خطرات کو اجاگر کیا۔

معروف دفاعی تجزیہ کار اعجاز حیدر نے مئی 2025 کے بحران کے دوران تنازعات کے بیانیے کی تشکیل میں بھارتی میڈیا کے کردار کا جائزہ لیا۔ انہوں نے اس بات پر روشنی ڈالی کہ کس طرح سنسنی خیزی، غلط معلومات اور فاتحانہ پروپیگنڈے نے تنازعہ کو تماشے میں تبدیل کر دیا، حقائق کو مسخ کیا گیا اور احتساب میں رکاوٹ ڈالی گئی۔ انہوں نے خبردار کیا کہ بیانیہ کی جنگ عسکری بحران کو بڑھا سکتی ہے۔