Live Updates

ڈپٹی ڈائریکٹر لائیو سٹاک کا فارمرز کو فوری چارہ کی کاشت کا مشورہ

بدھ 17 ستمبر 2025 17:03

سیالکوٹ (اُردو پوائنٹ اخبارتازہ ترین - اے پی پی۔ 17 ستمبر2025ء) ڈپٹی ڈائریکٹر محکمہ لائیو سٹاک سمبڑیال ڈاکٹر محمد افضل نے کاشتکاروں کو منظور شدہ قسم چناب برسیم، جئی، لوسرن، رائی اور بہاریہ مکئی کی برقت کاشت یقینی بنانے کا مشورہ دیا ہے ۔ان خیالات کا اظہار انہوں نے بدھ کو فارمرز کے نام اپنے پیغام میں کیا۔ انہوں نے کہا ہے کہ سیلاب کی تباہی کاریوں کے بعد برسیم اور جئی چارہ جات کی مخلوط کاشت کے فروغ سے اعلیٰ غذائیت سے بھر پور چارہ کی فراہمی سے دودھ اور گوشت کی پیداوار میں بھی خاطر خواہ اضافہ کیا جا سکتا ہے۔

(جاری ہے)

انہوں نے کہا کہ پاکستان کی معیشت کا زیادہ تر انحصار زراعت پر ہے اور زراعت میں لائیو سٹاک کا حصہ تقریبا55فیصدہے۔انہوں نے کہا کہ دودھ کی پیداوارمیں اضافہ اور جانوروں کو فربہ کرنے میں غذائیت سے بھر پور چارہ جات کی فراہمی بنیادی اہمیت کی حامل ہے۔انہوں نے کہا کہ فیلڈایریاز میں کئے گئے تجربات سے ثابت ہوا کہ اگر ہم زمین کا صحیح انتخاب وتیاری، اچھا بیج، مناسب اور متناسب کھادوں کا استعمال، بروقت کاشت، برداشت ،دیگر زرعی عوامل اور ماہرین کی سفارشات پر عمل کریں تو چارہ جات کی فی ایکڑ پیداوار میں نمایاں اضافہ کیا جاسکتاہے۔