حکومت سندھ متوازن غذائی اجزا کی خواتین اور بچوں تک مساوی رسائی کے لئے کوشاں ہے،آغا فخر حسین

کراچی(اُردو پوائنٹ اخبارتازہ ترین - این این آئی۔ 17 ستمبر2025ء) حکومت سندھ کے محکمہ انسانی حقوق نے سندھ میں میٹنگ فار نیوٹریشن (M4N) کے آغاز پر ایک اعلیٰ سطحی پینل ڈسکشن کے دوران غذائی اجزا سے مضبوط اور مقوی غذاں تک مساوی رسائی کو یقینی بنانے کے اپنے عزم کا اعادہ کیا۔ یہ اجلاس ایک مقامی ہوٹل میں منعقد ہوا ۔ محکمہ کی نمائندگی کرتے ہوئے آغا فخر حسین ڈائریکٹر انسانی حقوق محکمہ انسانی حقوق حکومت سندھ نے اس بات پر زور دیا کہ فوڈ فورٹیفکیشن صرف صحتِ عامہ کا معاملہ نہیں بلکہ یہ انسانی وقار، مساوات اور سماجی انصاف سے جڑا ہوا ایک بنیادی انسانی حق ہے۔

انہوں نے اس بات کو اجاگر کیا کہ غذائی کمی بالخصوص مائیکرونیوٹرینٹس کی کمی اب بھی کمزور طبقوں، بالخصوص خواتین، بچوں اور سندھ کے دور دراز علاقوں کی محروم برادریوں کو زیادہ متاثر کر رہی ہے۔

(جاری ہے)

آغا فخر حسین نے کہا کہ محفوظ اور مقوی غذا تک رسائی ایک بنیادی انسانی حق ہے۔ حکومت سندھ نے فوڈ فورٹیفکیشن ایکٹ 2021 کے ذریعے پیش رفت کے اقدامات کیے ہیں لیکن اصل چیلنج یہ ہے کہ مضبوط غذائیں قابلِ رسائی، سستی ہوں اور بالخصوص پسماندہ علاقوں تک بھی پہنچ سکیں۔

اس تقریب میں حکومت، صنعت، تعلیمی اداروں اور ترقیاتی شراکت داروں کے سینئر نمائندگان شریک ہوئے جن میں مرکزی چیئرمین پاکستان فلور ملز ایسوسی ایشن بدرالدین کاکڑ،مرکزی چیئرمین پاکستان وانسپتی مینوفیکچررز ایسوسی ایشن عمر ریحان شیخ،سینئر نیشنل منیجرنیوٹریشن انٹرنیشنل ضمیر حیدر سمیت حفیظ اللہ، محمد قوی خان اور معین قریشی (نیوٹریشن انٹرنیشنل ٹیم)شامل تھے۔

دیگر ماہرین میں ڈاکٹر عمر مختار تارڑ سینئر سائنٹیفک آفیسر، پی سی ایس آئی آر کراچی، ڈاکٹر غفران سعیدایسوسی ایٹ پروفیسر، جامعہ کراچی، ڈاکٹر طفیل شرازی، ڈاکٹر زاہد حسین ڈائریکٹر فوڈ ڈیپارٹمنٹ سندھ، ڈاکٹر احمد علی شیخ سندھ فوڈ اتھارٹی اور ڈاکٹر ثاقب شیخ ڈائریکٹر ہیلتھ سروسز سندھ بھی تقریب میں موجود تھے۔ان معزز شرکا نے فوڈ فورٹیفکیشن کے عملی، ریگولیٹری اور تحقیقی پہلوئوں پر ماہر آرا پیش کیں اور مثر نفاذ، صنعتی تعمیل اور شواہد پر مبنی پالیسی کے اطلاق کی ضرورت پر زور دیا۔

آغا فخر حسین نے اس عزم کا اعادہ کیا کہ محکمہ انسانی حقوق غذائی مساوات کے لیے اپنی کاوشیں جاری رکھے گا اور متعلقہ شراکت داروں کے ساتھ قریبی تعاون کرے گا تاکہ فوڈ فورٹیفکیشن بہتر صحت کے نتائج میں ڈھل سکے اور کوئی بھی کمیونٹی پیچھے نہ رہ جائے ۔