حنیف عباسی کی زیر صدارت اجلاس، ریلوے میں 8 ماہ کے دوران بجلی کی مد میں اربوں کی بچت

جدید اقدامات سے ریلوے کے اخراجات میں نمایاں کمی آئی ،شفافیت کے عمل کو مزید بہتر بنایا جا رہا ہے،بجلی چوری پر زیرو ٹالرنس ہوگی جو بھی اس جرم میں ملوث پایا گیا، سیدھا جیل جائے گا، وزیر ریلوے

بدھ 17 ستمبر 2025 20:15

اسلام آباد (اُردو پوائنٹ اخبارتازہ ترین - این این آئی۔ 17 ستمبر2025ء)وزیر ریلوے حنیف عباسی نے کہا ہے کہ جدید اقدامات کے باعث ریلوے کے اخراجات میں نمایاں کمی آئی ہے ،شفافیت کے عمل کو مزید بہتر بنایا جا رہا ہے،بجلی چوری پر زیرو ٹالرنس ہوگی جو بھی اس جرم میں ملوث پایا گیا، سیدھا جیل جائے گا۔ بدھ کو وزیر ریلوے محمد حنیف عباسی کی زیر صدارت اسلام آباد میں اہم اجلاس منعقد ہوا جس میں ریلوے کو بجلی کے اخراجات میں حاصل ہونے والی نمایاں کامیابیوں پر بریفنگ دی گئی۔

اجلاس کو بتایا گیا کہ گزشتہ آٹھ ماہ کے دوران میٹرائزیشن اور سولرائزیشن جیسے جدید اقدامات کے باعث اربوں روپے کی بچت ممکن ہوئی، جبکہ بجلی چوری کی مؤثر روک تھام نے ریلوے کو شاندار کامیابی دلائی۔اعداد و شمار کے مطابق لاہور ریلوے ڈویڑن میں 416.6 ملین روپے، مغلپورہ ورکشاپ میں 243 ملین روپے، کوئٹہ ریلوے ڈویڑن میں 38 ملین روپے، راولپنڈی ریلوے ڈویژن میں 75 ملین روپے، کراچی ریلوے ڈویڑن میں 26 ملین روپے اور سکھر ڈویڑن میں 60 ملین روپے کی بچت ریکارڈ کی گئی، اسی طرح ملتان میں 9.6 ملین جبکہ پشاور میں 6.46 ملین روپے کی بچت ممکن ہوئی۔

(جاری ہے)

وزیر ریلوے حنیف عباسی نے اجلاس سے خطاب کرتے ہوئے کہا کہ بجلی چوری پر زیرو ٹالرنس ہوگی اور جو بھی اس جرم میں ملوث پایا گیا، سیدھا جیل جائے گا۔ انہوں نے کہا کہ جدید اقدامات کے باعث ریلوے کے اخراجات میں نمایاں کمی آئی ہے اور شفافیت کے عمل کو مزید بہتر بنایا جا رہا ہے۔