ایبٹ آباد،ڈپٹی ڈائریکٹر انفارمیشن کا پرنٹنگ پریسز کا دورہ،تجدیدِ ڈیکلریشن کا ریکارڈ چیک

جمعرات 18 ستمبر 2025 23:24

ایبٹ آباد (اُردو پوائنٹ اخبارتازہ ترین - اے پی پی۔ 18 ستمبر2025ء) ڈپٹی ڈائریکٹر، ریجنل انفارمیشن آفیسر ایبٹ آباد اکرام اللہ سعید نے خیبر پختونخوا پریس،نیوز پیپرز،نیوز ایجنسیز اینڈ بک رجسٹریشن ایکٹ 2013 کے تحت ایبٹ آباد میں واقع مختلف پرنٹنگ پریسز کا دورہ کیا جس کے دوران پرنٹنگ پریسز کی ڈیکلریشن اور تجدید ڈیکلریشن کا ریکارڈ چیک کیا گیا۔

(جاری ہے)

اس موقع پر ریجنل انفارمیشن آفس کے اسسٹنٹ ارسلان رشید اور انجمن تاجران پرنٹنگ پریس یونین ایبٹ آباد کے صدر حاجی عباس سلیم بھی ان کے ہمراہ تھے۔دورہ کے دوران ایسے پرنٹنگ پریس مالکان کو نوٹسز جاری کیے گئے جن کی ڈیکلریشن مکمل نہیں تھی یا جنہوں نے تجدید نہیں کروائی تھی۔ریجنل انفارمیشن آفیسر نے واضح کیا کہ بغیر ڈیکلریشن اور تجدید کے کسی بھی پرنٹنگ پریس کی سرگرمیاں غیر قانونی ہیں اور اس ضمن میں قانونی کارروائی عمل میں لائی جائے گی۔دریں اثنا ریجنل انفارمیشن آفیسر نے ہزارہ ڈویژن میں قائم تمام پرنٹنگ پریسز کے مالکان کو مطلع کیا ہے کہ وہ اپنے پرنٹنگ پریسز کی سالانہ رجسٹریشن ہر صورت 30 ستمبر 2025 تک مکمل کریں۔