افغان مہاجرین کے انخلا میں انسانی وقار کا مکمل خیال رکھا جائے، وزیراعلیٰ بلوچستان

جمعرات 18 ستمبر 2025 22:51

کوئٹہ (اُردو پوائنٹ اخبارتازہ ترین - آن لائن۔ 18 ستمبر2025ء) وزیراعلیٰ بلوچستان میر سرفراز بگٹی نے کہا ہے کہ صوبے میں افغان مہاجرین کے انخلا کا عمل شفاف، منظم اور باوقار انداز میں مکمل کیا جائے گا تاکہ کسی فرد کی عزتِ نفس متاثر نہ ہو۔

(جاری ہے)

انہوں نے جمعرات کو اعلیٰ سطح اجلاس کی صدارت کرتے ہوئے واضح کیا کہ خواتین، بزرگوں اور بچوں کا خصوصی خیال رکھا جائے، جبکہ تحقیر آمیز رویہ ہرگز برداشت نہیں ہوگا۔

وزیراعلیٰ نے ہدایت کی کہ خواتین کی سہولت کے لیے عارضی بنیادوں پر فیمیل سکیورٹی اہلکار بھرتی کیے جائیں اور انخلا کے دوران ہر ممکن تعاون فراہم کیا جائے۔ اجلاس میں قلعہ عبداللہ کی امن و امان کی صورتحال کا بھی جائزہ لیا گیا اور جرائم پیشہ عناصر کے خلاف بلاامتیاز کارروائی کا فیصلہ کیا گیا۔