اسلامی جمعیت طلبہ کے زیراہتمام سرکاری اسکولوں اور کالجوں کی آؤٹ سورسنگ کے خلاف احتجاج

جمعرات 18 ستمبر 2025 20:52

پشاور(اُردو پوائنٹ اخبارتازہ ترین - این این آئی۔ 18 ستمبر2025ء)اسلامی جمعیت طلبہ کے زیراہتمام سرکاری اسکولوں اور کالجوں کی آؤٹ سورسنگ کے خلاف احتجاج،صوبہ بھر میں "تعلیم بچاؤ" کے نعرے کے تحت مظاہرے کیے گئے۔ اسلامی جمعیت طلبہ کے زیراہتمام سرکاری اسکولوں اور کالجوں کی آؤٹ سورسنگ کے خلاف احتجاجی مظاہرے ہوئے، پشاور، مردان، لوئر دیر، اپر دیر، بونیر، شانگلہ، صوابی، بٹگرام،مانسہرہ،بنوں، ایبٹ آباد اور ڈی آئی خان میں "تعلیم بچاؤ" مظاہرے منعقد ہوئے۔

پشاور: طلبہ نے کالجز، اسکولز اور پریس کلبز کے باہر احتجاجی مظاہرے کیے۔ مظاہرین کے ہاتھوں میں بینرز پر آؤٹ سورسنگ اور نجکاری کے خلاف نعرے درج تھے۔پشاور میں المرکزی اسلامی سے ریلی نکالی گئی۔ جی ٹی روڈ پر سرکاری تعلیمی اداروں کی نجکاری اور آؤٹ سورسنگ کے خلاف مظاہرہ کیا گیا۔

(جاری ہے)

سرکاری اسکولوں اور کالجوں کی آؤٹ سورسنگ کے فیصلے کو مسترد کرتے ہیں، مظاہرین کاکہنا تھا کہ نجکاری اور آؤٹ سورسنگ جیسے اقدامات تعلیم دشمنی کے مترادف ہیں، نجکاری اور آؤٹ سورسنگ سے متوسط اور غریب طبقے کے لئے اعلیٰ تعلیم کے دروازے بند ہو جائیں گے، حکومت فوری طور پر فیصلہ واپس لے، نجکاری اور آؤٹ سورسنگ کے خلاف 12 اکتوبر کو صوبہ بھر کے طلبہ پشاور پریس کلب کے سامنے احتجاج کریں گے۔