ڈپٹی میئر کراچی سلمان عبداللہ مراد سے جونا مارکیٹ اور کھجور بازار مرچنٹ ایسوسی ایشن کے وفد کی ملاقات

جونا مارکیٹ لیاری ٹاؤن کے علاقے میں گلیوں اور سڑکوں پر سیوریج کا پانی کھڑا ہونے کی وجہ سے تاجر برادری کو درپیش مسائل سے آگاہ کیا

جمعرات 18 ستمبر 2025 20:55

کراچی(اُردو پوائنٹ اخبارتازہ ترین - این این آئی۔ 18 ستمبر2025ء)ڈپٹی میئر کراچی سلما ن عبداللہ مرادسے جونا مارکیٹ اور کھجور بازارمرچنٹ ایسوسی ایشن کے وفد نے جمعرات کے روز ان کے دفتر میں ملاقات کی اور جونا مارکیٹ لیاری ٹاؤن کے علاقے میں گلیوں اور سڑکوں پر سیوریج کا پانی کھڑا ہونے کی وجہ سے تاجر برادری کو درپیش مسائل سے آگاہ کیا، انہوں نے کہا کہ علاقے میں گندگی کی وجہ سے ہمارا کاروبار شدید متاثر ہو رہا ہے اور گاہکوں کا وہاں آنا مشکل ہوگیا ہے جبکہ صحت و صفائی کی ناقص صورتحال کی وجہ سے بہت سے دکاندار بیماریوں میں بھی مبتلا ہوگئے ہیں اور انہیں معاشی مسائل کا سامنا کرنا پڑ رہا ہے لہٰذا اس مسئلے پر فوری توجہ دی جائے تاکہ ہم اپنا کاروبار صحیح طریقے سے چلا سکیں، ڈپٹی میئر کراچی سلمان عبداللہ مراد نے انہیں یقین دلایا کہ جونا مارکیٹ اور کھجور بازار لیاری ٹاؤن میں سیوریج کے پانی کی وجہ سے پیدا ہونے والے مسائل کے حل کے لئے فوری اقدامات عمل میں لائے جائیں گے، انہوں نے واٹر کارپوریشن کے متعلقہ ایکسئین کو بلا کراس مسئلے سے آگاہ کیا اور تاجر برادری کو ریلیف پہنچانے کے لئے اس مسئلے کو ترجیحی بنیادوں پر حل کرنے کی ہدایت کی، ڈپٹی میئر کراچی سلمان عبداللہ مراد نے کہا کہ بلدیہ عظمیٰ کراچی متعلقہ ٹاؤن انتظامیہ اور واٹر کارپوریشن کے ساتھ مل کر جونا مارکیٹ اور کھجور بازار میں کاروباری برادری کو سہولیات کی فراہمی کے لئے مزید عملی اقدامات کرے گی اور تاجروں کی ایسوسی ایشن کی مشاورت اور رہنمائی سے تمام امور کے لئے حکمت عملی اختیار کی جائے گی۔