Live Updates

محکمہ صحت کے میڈیکل کیمپ آٹھ لاکھ سے زائد سیلاب متاثرین کو علاج کی سہولت فراہم کر چکے ہیں،خواجہ عمران نذیر

جمعرات 18 ستمبر 2025 21:10

لاہور (اُردو پوائنٹ اخبارتازہ ترین - اے پی پی۔ 18 ستمبر2025ء) محکمہ صحت وآبادی سیلاب متاثرین کو طبی سہولیات فراہم کرنے کیلئے پر عزم اورسیلاب متاثرہ علاقوں میں امدادی سرگرمیاں جاری ہیں۔صوبائی وزیر صحت و آبادی خواجہ عمران نذیر نے کہا ہے کہ محکمہ صحت و آبادی کے میڈیکل و ریلیف کیمپس اب تک آٹھ لاکھ 22 ہزار سے زائد سیلاب متاثرین کو علاج معالجے کی سہولت فراہم کر چکے ہیں، گزشتہ چوبیس گھنٹوں میں 31 ہزار سے زائد سیلاب متاثرین کو طبی سہولیات فراہم کی جا چکی ہیں،محکمہ صحت و آبادی کے سیلاب متاثرہ علاقوں میں 603 میڈیکل ریلیف کیمپس آپریشنل ہیں،ان کیمپس میں 185 فکسڈ جبکہ 383 کلینک آن ویلز ہیں۔

انہوں نے کہا کہ سیلاب متاثرہ علاقوں میں 23 فیلڈ ہسپتال بھی متاثرین کو علاج معالجے کی سہولیات فراہم کر رہے ہیں،پانی میں گھرے علاقوں میں 12 کلینک آن بوٹ متاثرین کو طبی خدمات فراہم کر رہی ہیں۔

(جاری ہے)

صوبائی وزیر صحت و آبادی نے کہا کہ سیلاب متاثرہ علاقوں میں سانپ سے کاٹے کے ابتک 164 کیس رپورٹ ہوئے جبکہ گزشتہ 24 گھنٹوں میں سانپ سے کاٹے کے 8 کیس رپورٹ ہوئے ہیں،ریلیف کیمپس میں ابتک 52 ذیابیطس کے مریضوں کو انسولین کی سہولت فراہم کی گئی ہے، 343حاملہ خواتین کو ریلیف کیمپس میں طبی سہولیات فراہم کی گئیں ہیں،محکمہ صحت و آبادی ابتک 31 ہزار سے زائد ہائی جین کٹس سیلاب متاثرین میں تقسیم کر چکا ہے۔