فرانس کا ایران کے خلاف پابندیاں آئندہ چند دنوں میں بحال کر نے کا اعلان

پیرس (اُردو پوائنٹ اخبارتازہ ترین - اے پی پی۔ 19 ستمبر2025ء) فرانس نے ایران کے خلاف پابندیاں آئندہ چند دنوں میں بحال کر نے کا اعلان کیا ہے۔ العربیہ اردو کے مطابق فرانس کے صدر ایمانویل میکروں نے کہا ہے ہم توقع کرتے ہیں کہ ایرانی جوہری پروگرام کی وجہ سے ایران کے خلاف بین الاقوامی پابندیوں کا از سر نو اطلاق رواں ماہ کے اختتام تک ممکن ہو جائے گا۔

اسرائیلی ٹی وی چینل سے گفتگو میں انہوں نے کہا کہ ہم ایرانیوں کی طرف سے جو تازہ ترین خبریں سن رہے ہیں ان سے ظاہر ہوتا ہے کہ ایرانی سنجیدگی کا مظاہرہ نہیں کر رہے۔ برطانیہ،فرانس اور جرمنی بھی 2015 میں ایرانی جوہری پروگرام کے سلسلے میں ہونے والے بین الاقوامی معاہدے دستخط کرنے والے 6 ملکوں میں شامل ہیں۔ ان تینوں نے حالیہ ایران اسرائیل جنگ کے بعد بھی ایران کے ساتھ دوبارہ سے جوہری پروگرام پر بات چیت پر آمادگی ظاہر کی تھی مگر اس سلسلہ میں ہونے والے مذاکرات نتیجہ خیز نہ ہو سکے جس کے بعد ان یورپی ملکوں نے دھمکی دی تھی کہ 2015 کے معاہدے سے پہلے والی صورت حال واپس آسکتی ہے اور ایران کو از سر نو بین الاقوامی پابندیوں کا سامنا کرنا پڑ سکتا ہے۔

(جاری ہے)

فرانسیسی صدر نے کہا کہ ایران کے جوہری پروگرام کے حوالے سے ان کے ملک کا موقف ہمیشہ سےبڑا واضح رہا ہے۔ ہمارے ایران سے مطالبے بھی سب کے سامنے موجود ہیں۔ انہوں نے مزید کہا کہ میں سمجھتا ہوں یہ اسرائیل کے لیے بھی بہت اہم معاملہ ہے۔فرانسیسی صدر نے یہ بھی کہا کہ ہم نے ایرانی جوہری ہتھیاروں کے معاملے کو کبھی کم تر خطرے کے طور پر نہیں دیکھا۔

جیسا کہ اب ایرانی بیلسٹک میزائل بھی سامنے آئے ہیں اور ایران کی طرف سے خطے کو چیلنج بھی بڑھ گئے ہیں۔ خصوصا ایسے ماحول میں جب ایرانی کوئی واضح اور صاف کمٹمنٹ نہیں دیتے ۔ ان کا کہنا تھا ایران کے جوہری پروگرام کے حوالے سے ان کے ملک کا موقف یورپی پالیسی ہے۔ اس بارے میں ہم اپنے برطانوی اور جرمنی کے رفقا کے ساتھ مل کر کام کر چکے ہیں۔ ایرانی کمٹمنٹ سامنے نہ آنے پر ہم سنیپ بیک میکانزم کے تحت پھر سے ایران پر پابندیاں لگا دیں گے۔