عبدالرحمان اور مصطفیٰ عرفان نے آل پاکستان نیشنل جونیئرسکواش چیمپئن شپ جیت لی

جمعہ 19 ستمبر 2025 20:31

پشاور(اُردو پوائنٹ اخبارتازہ ترین - این این آئی۔ 19 ستمبر2025ء) آل پاکستان نیشنل جونیئر سکواش چیمپئن شپ 2025 میں پاکستان ایئر فورس کے کھلاڑیوں کی برتری،انڈر 11 کیٹگری میں عبدالرحمان اور انڈر 17 میں مصطفیٰ عرفان نے چیمپئن کا اعزاز حاصل کرلیا،پشاور سپورٹس کمپلیکس کے قمرزمان سکواش کورٹ میں کھیلے گئے فائنل مقابلوں میں انڈر 11 کیٹگری میں پی اے ایف کے عبدالرحمان نے پی اے ایف ہی کے آنس رافع کو 11-5,11-6 اور 8-11 جبکہ انڈر 17 میں پی اے ایف کے مصطفیٰ عرفان نے پی اے ایف کیعبداللہ زمان کو9-11, 9-11اور 5-11سے شکست دے کرٹرافی اپنے نام کرلی اختتامی تقریب کے مہمان خصوصی سیکرٹری پبلک ہیلتھ اور چیئرمین صوبائی سکواش ایسوسی ایشن داؤد خان نے کھلاڑیوں میں انعامات تقسیم کئے اس موقع پر ان کے ہمراہ سکواش لیجنڈ قمرزمان ،چیف انجینئر میر آدام وزیر،سیکرٹری جنرل اے آئی پی ایس امجد اعزیز ملک، صوبائی نائب صدراحسان، محب اللہ،گروپ کیپٹن عرفان اظہر،سیکرٹری منصور زمان،محمد وسیم اور چیف کوچ و آرگنائزر منور زمان سمیت دیگر شخصیات موجود تھے، اختتامی تقریب کے موقع پر مہمان خصوصی داؤد خان نے میڈیا سے گفتگو کرتے ہوئے کہا کہ ایونٹ کے انعقاد سے ملک میں کھیلوں کی مثبت سرگرمیوں کو فروغ ملا ہے انہوں نے کہا کہ جونیئر کھلاڑیوں نے جس جذبے اور محنت کا مظاہرہ کیا ہے وہ مستقبل میں پاکستان اسکواش کے روشن مستقبل کی ضمانت ہے انہوں نے مزید کہا کہ ایسے ایونٹس سے نہ صرف نوجوان کھلاڑیوں کو اپنی صلاحیتیں دکھانے کا موقع ملتا ہے بلکہ عالمی سطح پر ملک کا نام بلند کرنے کے لئے بھی نئی راہیں کھلتی ہیں۔