Live Updates

اگر پاکستان کے پاس 200 رنز ہوتے تب بھی بولرز اس کا دفاع نہ کرپاتے، شعیب اختر کا ردعمل

آپ کی باؤلنگ لائن اپ اس قابل ہی نہیں تھی بلکہ پاکستان کی باؤلنگ ناقص تھی، حارث رؤف نے حریف کےایک بھی بلے باز کو آؤٹ نہیں کیا؛ سابق سپیڈ سٹار کا تجزیہ

ساجد علی پیر 22 ستمبر 2025 12:23

اگر پاکستان کے پاس 200 رنز ہوتے تب بھی بولرز اس کا دفاع نہ کرپاتے، شعیب ..

اسلام آباد ( اُردو پوائنٹ اخبارتازہ ترین۔ 22 ستمبر2025ء ) پاکستان کے سابق سپیڈ سٹار شعیب اختر کا کہنا ہے کہ اگر پاکستان کے پاس 200 رنز ہوتے تب بھی بولرز اس کا دفاع نہ کرپاتے۔ تفصیلات کے مطابق پی ٹی وی سپورٹس کے پروگرام میں پاکستان اور بھارت کے میچ پر تجزیہ پیش کرتے ہوئے سابق فاسٹ بولر شعیب اختر نے ایشیاء کپ سپر فور میچ میں بھارت کے ہاتھوں پاکستان کرکٹ ٹیم کی یکطرفہ شکست پر سخت ردعمل دیا اور کہا کہ ابرار سے پہلے پارٹ ٹائم باؤلرصائم ایوب آ رہے ہیں، حالاں کہ ابرارآپ کے مین باؤلر ہیں، اسی طرح اگر فہیم اشرف کو بولنگ کرنی تھی تو نئی گیند کا استعمال کرنا چاہیئے تھا اگر وہ صائم کی جگہ لے لیتے تو وہ کارآمد ثابت ہوتے۔

انہوں نے کہا کہ اگر پاکستانی ٹیم نے 200 رن بھی بنائے ہوتے تب بھی بولرز اس کا دفاع نہیں کرپاتے کیوں کہ آپ کی باؤلنگ لائن اپ اس قابل ہی نہیں تھی، بلکہ پاکستان کی باؤلنگ ناقص تھی، حارث رؤف نے حریف کےایک بھی بلے باز کو آؤٹ نہیں کیا، ہندوستانی بلے باز اپنی غلطیوں سے آؤٹ ہوئے، سوریا کمار یادیو نے غلط شاٹ کھیلا اور پاکستان کو وکٹ مل گئی ورنہ یہ میچ تواتنا آگے بھی نہیں جاتا۔

(جاری ہے)

سابق فاسٹ بولر کا یہ بھی کہنا ہے کہ ابھیشیک شرما اگر کچھ دیر اور کریز پر رہتے تو میچ پانچ اوور پہلے ہی ختم ہوجاتا، ان کے آؤٹ ہونے کی وجہ سے مقابلہ انیسویں اوور تک گیا اور ذرا سوچیں انڈیا کی اس ٹیم کے پاس ابھی تو کے ایل راہل نہیں ہے، جو ہمیشہ گیند بازوں کو مارتا ہے، سنجو سیمسن کی بجائے کے ایل راہل کو انڈین ٹیم میں ہونا چاہیئے تھا کیوں کہ سنجو سیمسن ان کی کمزور کڑی تھے اسی وجہ سے میچ 19 ویں اوور تک چلا گیا۔