Live Updates

ہماری جیت کا تناسب 1-10 ہے‘ پاکستان اب کرکٹ میں حریف نہیں رہا، بھارتی کپتان

ابھیشیک بیٹنگ سٹائل میں بہت ہی بے لوث ہے، یہ بس اس کا انداز ہے، پاور پلے میں وہ سخت کھیلتا ہے لیکن اس کے بعد بھی اسے پتا ہوتا ہے کہ کیا ضروری ہے؛ سوریا کمار یادیو کی گفتگو

ساجد علی پیر 22 ستمبر 2025 11:05

ہماری جیت کا تناسب 1-10 ہے‘ پاکستان اب کرکٹ میں حریف نہیں رہا، بھارتی ..

دبئی ( اُردو پوائنٹ اخبارتازہ ترین۔ 22 ستمبر2025ء ) بھارتی کرکٹ ٹیم کے کپتان سوریا کمار یادیو کا کہنا ہے کہ پاکستان کے میچز میں بھارت کی جیت کا تناسب تقریباً 1-10 ہے، پاکستان کرکٹ کے مقابلوں میں اب ہمارا حریف نہیں رہا۔ میچ کے بعد پریس کانفرنس کرتے ہوئے انہوں نے کہا کہ ہم نے پہلے فیلڈنگ کرنے کا فیصلہ وکٹ کو سمجھ کر کیا، میچ کا ٹرننگ پوائنٹ 10 اوورز کے بعد کا تھا، بریک کے بعد بھارتی باؤلرز نئے روپ میں سامنے آئے تاہم فیلڈنگ میں ہم سے غلطیاں ہوئیں، لگتا ہے کیچ چھوڑنے والوں کے ہاتھوں میں مکھن لگا ہوا تھا۔

سوریا کمار یادو نے کہا کہ ابھیشیک بیٹنگ سٹائل میں بہت ہی بے لوث ہے، یہ بس اس کا انداز ہے، پاور پلے میں وہ سخت کھیلتا ہے لیکن اس کے بعد بھی اسے پتا ہوتا ہے کہ کیا ضروری ہے، ابھیشک صورتحال کا تجزیہ کرتا ہے، ہر میچ سے سیکھ رہا ہے، سب سے اہم بات یہ ہے کہ وہ کبھی پریکٹس نہیں چھوڑتا، چاہے اسے بیٹنگ کا دل نہ بھی ہو پھر بھی وہ گراؤنڈ میں ہوتا ہے اور کچھ نہ کچھ کرتا رہتا ہے، جب آپ اتنی محنت کرتے ہیں تو خدا کے پاس ہمیشہ آپ کے لیے منصوبے ہوتے ہیں۔

(جاری ہے)

بتایا جارہا ہے کہ ایشیا کپ سپر فور راؤنڈ کے دوسرے مقابلے میں بھارت نے پاکستان کو آسانی سے 6 وکٹوں سے شکست دے دی، دبئی کرکٹ سٹیڈیم میں کھیلے گئے میچ میں بھارت نے پاکستان کا 172 رنز کا ہدف 4 وکٹوں کے نقصان پر 19ویں اوور میں حاصل کیا، اوپنر بیٹر ابھیشک شرما نے پاکستانی باؤلرز کے خلاف جارحانہ بلے بازی کا مظاہرہ کرتے ہوئے 39 گیندوں پر برق رفتار 74 رنز کی اننگز کھیلی تھی، ٹاپ آرڈر بلے باز کو ابرار احمد نے آؤٹ کیا تھا۔

اسی طرح شمبن گل 28 گیندوں پر47 رنز بنا کر فہیم اشرف کا شکار بنے تھے، بھارتی کپتان سوریا کمار یادیو دوسری ہی گیند پر کیچ آؤٹ ہوئے، سنجو سیمسن 13 رنز بنا کر پویلین واپس لوٹے، تلک ورما 30 اور ہاردیک پانڈیا 7 رنز بنا کر ناٹ آؤٹ رہے، پاکستان کے حارث رؤف نے 2 وکٹیں اپنے نام کیں، ابرار احمد اور فہیم اشرف نے ایک، ایک کھلاڑی کو آؤٹ کیا۔

قبل ازیں پاکستان نے پہلے کھیلتے ہوئے مقررہ 20 اوورز میں 5 وکٹوں کے نقصان پر 171 رنز بنائے، پاکستان کے پہلے آؤٹ ہونے والے کھلاڑی فخر زمان تھے، اوپننگ بلے باز 9 گیندوں پر 15 رنز بنا کر ہاردیک پانڈیا کا شکار بنے اور ناقص امپائرنگ کی بھینٹ چڑھ گئے کیوں کہ بھارتی وکٹ کیپر نے جب فخر زمان کا کیچ پکڑا تو گیند گراؤنڈ کو چُھو رہی تھی۔

اس کے بعد بھارت کیخلاف پاکستان بلے بازوں نے بھرپور ’لاٹھی چارج‘ کیا، صاحبزادہ فرحان اور صائم ایوب نے ذمہ دارانہ بیٹنگ کی اور ٹیم کا سکور 10اوورز میں 93 رنز تک پہنچایا اور صائم ایوب 21 رنز بنا کر دوبے کی گیند پر کیچ آؤٹ ہوگئے، حسین طلعت 110 کے مجموعی سکور پر 10 رنز بنا کر کلدیپ یادیو کے ہاتھوں پویلین لوٹ گئے۔

جب پاکستان کا سکور 115 ہوا تو صاحبزادہ فرحان بھی 58 رنز بنا کر دوبے کی گیند پر کیچ دے بیٹھے، انہوں نے 3 چھکوں اور 5 چوکوں کی مدد سے 45 گیندوں پر 58 رنز کی اننگز کھیلی، محمد نواز 149 کے سکور پر 21 رنز بناکر رن آؤٹ ہوئے، کپتان سلمان آغا 17 اور فہیم اشرف 8 گیندوں پر 20 رنز بناکر ناٹ آؤٹ رہے، بھارت کی طرف سے شیوم دوبے نے 2، کلدیپ یادیو اور ہاردیک پانڈیا نے 1,1وکٹ حاصل کی۔