برطانیہ کا بہترین عالمی ٹیلنٹ کے لیے ویزا فیس ختم کرنے کے منصوبے پر غور

پیر 22 ستمبر 2025 15:04

لندن (اُردو پوائنٹ اخبارتازہ ترین - اے پی پی۔ 22 ستمبر2025ء) برطانوی وزیراعظم کیئر سٹارمر ایسے وقت میں بہترین عالمی ہنر مندوں کے لیے کچھ ویزا فیسوں کو ختم کرنے کی تجاویز پر غور کر رہے ہیں جب امریکا نے امیگریشن پر سخت موقف اختیار کیا ہے۔برطانوی خبر رساں ادارے رائٹرز نے فنانشل ٹائمز کے حوالے سے رپورٹ کیا ہے کہ سٹارمر کی ’عالمی ٹیلنٹ ٹاسک فورس‘ معاشی ترقی کو فروغ دینے کے لیے دنیا کے بہترین سائنسدانوں، ماہرین تعلیم اور ڈیجیٹل ماہرین کو برطانیہ کی طرف راغب کرنے کے لیے آئیڈیاز پر کام کر رہی ہے تاہم ٹریژری ڈیپارٹمنٹ اور ڈاؤننگ سٹریٹ نے فوری طور پر اس پر کوئی ردعمل یا موقف نہیں دیا۔

رپورٹ کے مطابق امریکی صدر ڈونلڈ ٹرمپ نے کہا ہے کہ ان کا ملک امیگریشن کے خلاف وسیع پیمانے پر کریک ڈاؤن کے سلسلے میں اتوار سے نئے ایچ ون بی ویزوں کے لیے ایک لاکھ ڈالر فیس عائد کرے گا۔

(جاری ہے)

انہوں نے اوول آفس میں حکم نامے پر دستخط کرتے ہوئے صحافیوں کو بتایا کہ اہم بات یہ ہے کہ ہمارے پاس عظیم لوگ آنے والے ہیں اور وہ ادائیگی کریں گے۔ایچ ون بی ویزا کمپنیوں کو خصوصی مہارتوں کے حامل غیر ملکی کارکنوں جیسے کہ سائنسدانوں، انجینئرز اور کمپیوٹر پروگرامرز وغیرہ کو سپانسر کرنے کی اجازت دیتا ہے۔اس ویزے کے تحت یہ غیر ملکی کارکن امریکا میں ابتدائی طور پر تین سال کے لیے کام کر سکتے ہیں تاہم اس مدت کو چھ سال تک بڑھایا جا سکتا ہے۔