Live Updates

گندم کے انتہائی تشویش ناک بحران کیلئے تیار ہو جائیں

گندم کی کاشت میں 50 فیصد کمی کا خدشہ ظاہر کر دیا گیا

محمد علی منگل 23 ستمبر 2025 23:08

اسلام آباد (اُردو پوائنٹ اخبارتازہ ترین۔ 23 ستمبر2025ء) گندم کے انتہائی تشویش ناک بحران کیلئے تیار ہو جائیں، گندم کی کاشت میں 50 فیصد کمی کا خدشہ ظاہر کر دیا گیا، حکومت کا بیرون ملک سے گندم کی خریداری کیلئے ڈیڑھ ارب ڈالرز کا قیمتی زرمبادلہ خرچ کرنے کا عندیہ، کسانوں کی آہ و بکا کے باوجود کسانوں سے گندم خریدنے سے انکار کرنے والی حکومت کا گندم کی امدادی قیمت مقرر نہ کرنے سے گندم کی پیداوار کم ہونے کا اعتراف۔

تفصیلات کے مطابق وفاقی وزیر فوڈ سیکیورٹی رانا تنویر حسین نے اگلے سال ڈیڑھ ارب ڈالر کی گندم درآمد کرنے کا عندیہ دیدیا ۔ منگل کو قومی اسمبلی کی قائمہ کمیٹی کے اجلاس کے دوران وفاقی وزیر نے گندم سے متعلق پالیسی جلد لانے کا اعلان کیا۔انہوں نے کہا کہ کوشش ہے اکتوبر کے پہلے ہفتے میں گندم پالیسی کا اعلان ہو، گندم کی سپورٹ پرائس رکھنے کی تجویز دی ہے۔

(جاری ہے)

وفاقی وزیر نے کہا کہ عالمی مالیاتی ادارے (آئی ایم ایف) سے اس متعلق بات کر رہے ہیں، جو حالات ہیں لگتا ہے، اس سال گندم کی کاشت 50 فیصد کم ہوجائے گی۔ حکومت نے گندم کی امدادی قیمت بحال کرنے کیلئے آئی ایم ایف سے رابطے کا فیصلہ کیا ہے، کوشش کر رہے ہیں کہ فوڈ آئٹمز پر آئی ایم ایف کو قائل کر لیں۔ وفاقی وزیر رانا تنویر نے بتایا کہ حکومتی کنٹرول کم ہونے سے مارکیٹ میں گندم کی قیمتیں بڑھی ہیں، گندم کی امدادی قیمت نہ دینے سے پیداوار پر فرق پڑا ہے۔

کوشش کر رہے ہیں کہ کسانوں اور عوام کا تحفظ کیا جائے۔ چینی سے متعلق کمیٹی کے سوالات کا جواب دیتے ہوئے انہوں نے کہا کہ ہم 15 کروڑ ڈالر کی چینی منگوا رہے ہیں، اس بار گنے کی بمپر کراپ تھی، جو سیلاب سے متاثر ہو سکتی ہے، مافیا کے باعث چینی کی قیمت بڑھی ہے۔