سونا ہزاروں روپے مہنگا، نئی قیمت 3 لاکھ 98 ہزار 800 کی بلند ترین سطح پر پہنچ گئی

آج پھر سونے کی قیمت میں 5 ہزار 100 روپے کا بڑا اضافہ ہوا، دو روز میں ساڑھے 8 ہزار روپے اضافہ ریکارڈ کیا گیا، پچھلے ایک ماہ میں سونے کے نرخ 32 ہزار روپے سے زائد بڑھ گئے

ثنااللہ ناگرہ منگل 23 ستمبر 2025 19:16

سونا ہزاروں روپے مہنگا، نئی قیمت 3 لاکھ 98 ہزار 800 کی بلند ترین سطح پر ..

کراچی ( اردوپوائنٹ اخبار تازہ ترین۔ آئی پی اے۔ 23 ستمبر 2025ء ) عالمی مارکیٹ میں سونے کی قیمتوں میں اتار چڑھاؤ کا سلسلہ جاری ہے، عالمی منڈی میں سونے کے نرخ بڑھنے پر پاکستان میں بھی قیمتوں میں نمایاں اضافہ ہوگیا ہے۔ میڈیا رپورٹ کے مطابق عالمی مارکیٹ میں سونے کی قیمتوں میں اضافہ ہونے کے باعث پاکستان میں بھی سونے کی قیمت بڑھ گئی ہے۔ بڑے اضافے کے بعد فی تولہ سونے کی نئی قیمت بلند ترین سطح پر پہنچ گئی ہے۔

آج ملک کی صرافہ مارکیٹوں میں فی تولہ سونا 5 ہزار 100 روپے مہنگا ہوا ہے، جس کے باعث فی تولہ سونے کی نئی قیمت بڑھ کر3 لاکھ 98 ہزار 800 روپے کی بلند ترین سطح پر پہنچ گئی ہے۔ اسی طرح دس گرام سونے کی قیمت بھی بڑھ گئی ہے۔ 10 گرام سونے کی قیمت میں 4 ہزار 372 روپے کا اضافہ ہوا ہے۔

(جاری ہے)

نئی قیمت 3 لاکھ 41 ہزار 906 روپے کی سطح پر پہنچ گئی ہے۔ یاد رہے ایک ماہ پہلے 24 قیراط سونے کی قیمت تقریباً 3 لاکھ 59 ہزار روپے کی سطح پر ریکارڈ کی گئی تھی۔

لیکن پچھلے ایک ماہ میں سونے کے نرخ 32 ہزار روپے سے زائد بڑھ گئے ہیں۔ دوسری جانب نیوزایجنسی کے مطابق پٹرولیم مصنوعات کی درآمدات میں جاری مالی سال کے پہلے دوماہ میں سالانہ بنیادوں پر 5 فیصد کی کمی ریکارڈ کی گئی ہے۔ پاکستان بیورو برائے شماریات ( پی بی ایس) کے اعدادوشمار کے مطابق جاری مالی سال کے پہلے دوماہ میں پٹرولیم مصنوعات کی درآمدات پر 2.538ارب ڈالر زرمبادلہ خرچ ہوا جو گزشتہ مالی سال کی اسی مدت کے مقابلہ میں 5فیصد کم ہے۔

اعداد وشمار کے مطابق گزشتہ مالی سال کی اسی مدت میں پٹرولیم مصنوعات کی درآمدات پر 2.662ارب ڈالر زرمبادلہ خرچ ہوا تھا، اگست 2025 میں پٹرولیم مصنوعات کا مجموعی درآمدی بل 1.193ارب ڈالرریکارڈ کیا گیا جو گزشتہ سال اگست کے 1.398ارب ڈالر کے مقابلہ میں 14.7فیصد کم ہے۔ جولائی کے مقابلہ میں اگست میں پٹرولیم مصنوعات کی درآمدات میں ماہانہ بنیادوں پر11.4فیصد کی کمی ہوئی ہے،جولائی میں پٹرولیم مصنوعات کی درآمدات پر1.346ارب ڈالر زرمبادلہ خرچ ہواتھا۔