ایشیا کپ میں سری لنکا کو شکست دینے کے بعد پاکستان کرکٹ ٹیم کیلئے ایک اور بڑی خوشخبری

ابوظہبی (اُردو پوائنٹ اخبارتازہ ترین۔ 23 ستمبر2025ء) ایشیا کپ میں سری لنکا کو شکست دینے کے بعد پاکستان کرکٹ ٹیم کیلئے ایک اور بڑی خوشخبری، فائنل تک رسائی سے محروم رہ جانے کے خدشے سے دوچار قومی کرکٹ ٹیم کی ایک ہی فتح کے بعد پوزیشن بہتر ہو گئی، پوائنٹس ٹیبل پر بہتر نیٹ رن ریٹ کے باعث پاکستان دوسرے نمبر پر آ گیا، سپر 4 مرحلے میں فتح حاصل کرنے والی بنگلہ دیش کے مقابلے میں پاکستان کا نیٹ رن ریٹ بہتر ہو گیا، بنگلہ دیش کیخلاف فتح کی صورت میں پاکستان کی فائنل تک رسائی تقریباً یقینی ہو جائے گی۔

واضح رہے کہ ایشیا کپ ٹی 20 کے سپر فور مرحلے کے تیسرے میچ میں پاکستان نے سری لنکا کو شکست دے دی، یہ 6 سال بعد ٹی ٹوئنٹی فارمیٹ میں پاکستان کی سری لنکا کیخلاف پہلی فتح تھی۔ محمد نواز کی دلیرانہ اننگ اور حسین طلعت کی ذمے دارانہ بیٹنگ کے باعث پاکستان نے مطلوبہ ہدف 5 وکٹوں کے نقصان پر حاصل کر لیا۔

(جاری ہے)

ابوظہبی میں کھیلے گئے میچ میں سری لنکا نے پاکستان کو جیت کیلئے 134 رنز کا ہدف دیا۔

پاکستان نے ٹاس جیت کر سری لنکا کو پہلے بیٹنگ کی دعوت دی، پاکستانی باؤلرز کے سامنے سری لنکا کی بیٹنگ لائن کھڑی نہ ہو سکی اور سری لنکا نے مقررہ 20 اوورز میں 8 وکٹوں کے نقصان پر133 رنز بنائے۔ سری لنکا کی جانب سے پیتھم نسانکا اور کوشال مینڈس نے اننگ کا آغاز کیا تاہم کوشال مینڈس ایک رن کے مجموعی سکور پر بغیر کھاتہ کھولے ہی شاہین آفریدی کی گیند پر حسین طلعت کے ہاتھوں کیچ آؤٹ ہو گئے، 18 رنز کے مجموعی سکور پر سری لنکا کی دوسری وکٹ گر گئی جب پیتھم نسانکا میچ کے تیسرے اوور میں شاہین کی گیند پر ہی 8 رنز بنا کر کیچ آؤٹ ہو گئے۔

نئے آنے والے بلے باز کوشال پریرا اور کپتان اسالنکا نے اننگ آگے بڑھائی تاہم 43 رنز کے مجموعی سکور پر کوشال پریرا بھی 15 رنز بنا کر فہیم اشرف کی گیند پر محمد حارث کوکیچ تھما کر پویلین لوٹ گئے۔ سری لنکن ٹیم کا سکور 58 پر پہنچا تو ایک ساتھ 2 وکٹیں گر گئیں، لنکن کپتان اسالنکا 20 جبکہ داشن شناکا بغیر کھاتہ کھولے ہی حسین طلعت کا شکار ہو گئے۔

وانندو ہاسارنگا بھی 15 رنز بنا کر ابرار احمد کا شکار بن گئے جبکہ کامنڈو مینڈس 50 رنز بنا کر نمایاں رہے۔ سری لنکا کے دشمانتھا چمیرا نے ایک رن بنا کر ہی پویلین کی راہ لی جبکہ چمیکا کرونارٹنے نے 21 گیندوں پر 17 رنز کی ناٹ آؤٹ اننگ کھیلی۔ پاکستان کی جانب سے شاہین آفریدی نے 3، حارث رؤف اور حسین طلعت نے 2،2 جبکہ ابرار احمد نے ایک کھلاڑی کو پویلین کی راہ دکھائی۔ واضح رہے کہ ایشیا کپ کے فائنل تک رسائی کی امیدوں کا زندہ رکھنے کےلیے دونوں ٹیموں کا یہ میچ جیتنا انتہائی ضروری تھا ۔