چیئرمین پی سی بی محسن نقوی کا ملک بھر میں سکولوں کیلئے بڑے ٹیلنٹ ہنٹ پروگرام کاافتتاح

لاہور (اُردو پوائنٹ اخبارتازہ ترین - اے پی پی۔ 23 ستمبر2025ء) پاکستان کرکٹ بورڈ (پی سی بی)نے ملک بھر میں سکولوں کیلئے بڑے ٹیلنٹ ہنٹ پروگرام کا آغاز کر دیا ہے۔کریسنٹ ماڈل ہائیر سکول میں ٹیلنٹ ہنٹ پروگرام برائے سکولز کی افتتاحی تقریب کا انعقاد کیا گیاجس میں چیئرمین پی سی بی نے ٹورنامنٹ کی ٹرافی کی رونمائی کی۔اس موقع پر محسن نقوی کا کریسنٹ ماڈل ہائر سیکنڈری سکول اور کریسنٹ گرائمر سکول کے کھلاڑیوں سے تعارف کرایا گیا ۔

چیئرمین پی سی بی نے ٹیموں کو پی سی بی کے کٹ بیگز دئیے۔ افتتاحی تقریب سے خطاب کرتے ہوئے محسن نقوی نے کہا کہ ٹیلنٹ ہنٹ پروگرام ملک بھر کے تمام صوبوں میں بیک وقت شروع ہو رہا ہے۔ ٹیلنٹ ہنٹ پروگرام میں ملک بھر سے 391 سکول حصہ لے رہے ہیں جس میں 175 سرکاری سکول جبکہ 218 نجی سکول شامل ہیں۔

(جاری ہے)

انہوں نے کہا کہ ہمارا مقصد صرف سے نئے کرکٹ سٹارز کی تلاش ہے۔

امید ہے کہ ٹورنامنٹ سے نئے کھلاڑی سامنے آئیں گے جو پاکستان ٹیم میں شامل ہوکر ملک کا نام روشن کریں گے۔ ٹیلنٹ ہنٹ پروگرام سے سکولوں سے کرکٹ سٹارز ابھریں گے۔ چیئرمین محسن نقوی نے بتایا کہ میں نے کریسنٹ ماڈل ہائیر سکول میں تعلیم حاصل کی۔ اس سکول سے بہت سے یادیں وابستہ ہیں۔ انہوں نے کہا کہ یہ پروگرام ٹیلنٹ کی تلاش کے دائرہ کار کو وسعت دینے اور نوجوانوں کو روایتی ڈھانچے کے علاوہ تعلیمی اداروں سے سامنے لانے کی جانب ایک اہم قدم ہے۔

طلبا کو تعلیم کے ساتھ ساتھ پیشہ وارانہ کرکٹ میں کیریئر بنانے کا موقع ملے گا۔ مجھے امید ہے کہ تمام سکول بہترین ٹیلنٹ سامنے لائیں گے اور ہم اچھے کھلاڑیوں کا انتخاب کریں گے۔ پی سی بی ٹورنامنٹ میں جیتنے والی ٹیموں کی حوصلہ افزائی کرے گا اور بہترین کارکردگی دکھانے والے کھلاڑیوں کو انڈر15،انڈر17 اور انڈر 19 ریجنل ٹیموں اور اکیڈمیوں میں شامل کیا جائے گا۔

افتتاحی تقریب میں بورڈ آف گورنرز پی سی بی کے ممبر انوار غنی۔منیجنگ ٹرسیٹز کریسنٹ ماڈل ہائیر سکول میاں سیلم الطاف۔ پرنسپل رابعہ نجم۔ صدر ایل سی سی اے خواجہ ندیم ،سیکرٹری سپورٹس ڈی جی پنجاب سپورٹس بورڈ،چیف فنانشل آفیسر پی سی بی جاوید مرتضی، ڈائریکٹر ڈومیسٹک کرکٹ عبداللہ خرم نیازی اور متعلقہ حکام نے شرکت کی۔