تھرڈ کنٹری آپریٹر کی منظوری ،پی آئی اے کی براہ راست برطانوی فضائی آپریشن کی راہ ہموار

بدھ 24 ستمبر 2025 11:51

اسلام آباد (اُردو پوائنٹ اخبارتازہ ترین - اے پی پی۔ 24 ستمبر2025ء) قومی ایئر لائن پی آئی اے کو برطانیہ کے لیے تھرڈ کنٹری آپریٹر (ٹی سی او) کی باضابطہ منظوری مل گئی،پی آئی اے کا آئندہ ماہ سے برطانیہ کے لیے براہ راست فضائی آپریشن کا آغاز کرے گا۔بدھ کو پی آئی اے کے ترجمان کے بیان کے مطابق پہلے مرحلے میں مانچسٹر کی پروازیں چلائی جائیں گی جس کے بعد برمنگھم اور لندن بی نیٹ ورک میں شامل کیا جائے گا۔

گزشتہ روز برطانوی محکمہ ٹرانسپورٹ کی جانب سے باقاعدہ طور پر پی آئی اے کو آگاہ کر دیا گیا ہے۔ پی آئی اے کو جامع اور ہمہ جہتی منظوری دی گئی جس سے پی آئی اے براہ راست پروازیں آپریٹ کرےگی اور نہ صرف مسافر بلکہ کارگو بھی لے کر جائے گا۔گزشتہ روز ہی برطانوی محکمہ ٹرانسپورٹ نے پی آئی اے سکیورٹی اور کارگو کو پانچ سال کے لیےاے سی سی تھری سرٹیفکیٹ بھی جاری کیا ہے ۔

(جاری ہے)

بین الاقوامی ہوابازی کے اداروں کی جانب سے جاری کردہ یہ سرٹیفکیٹس پی آئی اے کے فضائی آپریشنز اور سیفٹی پر مکمل اعتماد کا مظہر ہے۔سی ای او پی آئی اے نے وزیر اعظم پاکستان، نائب وزیر اعظم، وزیر دفاع، وزارت دفاع اور سول ایوی ایشن کی سرپرستی اور دیگر منسلک اداروں کے تعاون پر ان کا خصوصی شکریہ ادا کیا۔ انہوں نے پی آئی اے کی ٹیم کا شکریہ بھی ادا کیا جنہوں نے 5 سال ثابت قدمی سے متعدد آڈٹس کا سامنا کیا اور اس میں کامیابی حاصل کی ۔