وزیرصحت پنجاب کی زیر صدارت اہم اجلاس ، کارڈیک پراجیکٹ پر جاری پیشرفت کا تفصیلی جائزہ

جمعرات 25 ستمبر 2025 17:10

لاہور (اُردو پوائنٹ اخبارتازہ ترین - این این آئی۔ 25 ستمبر2025ء) صوبائی وزیر صحت خواجہ سلمان رفیق نے پنجاب کی عوام کو نواز شریف کارڈیالوجی سنٹر مری میں سرجریز کے آغاز کی خوشخبری سنا دی۔اس حوالے سے محکمہ سپیشلائزڈ ہیلتھ کیئر اینڈ میڈیکل ایجوکیشن میں اہم اجلاس منعقدہوا۔اجلاس کی صدارت صوبائی وزیر صحت خواجہ سلمان رفیق نے کی۔صوبائی وزیر خواجہ سلمان رفیق نے اس کارڈیک پراجیکٹ پر جاری پیش رفت کا تفصیلی جائزہ لیا۔

اجلاس میں سیکرٹری صحت پنجاب عظمت محمود خان نے شرکت کی۔اجلاس میں سپیشل سیکرٹری آپریشنز طارق محمود رحمانی، ایڈیشنل سیکرٹری انور بریار، ایڈیشنل سیکرٹری اشفاق الرحمٰن، ایڈیشنل سیکرٹری امیر محمد، ڈائریکٹر بجٹ اینڈ اکاونٹس حماد الرب و دیگر افسران نے شرکت کی۔

(جاری ہے)

وڈیو لنک کے ذریعے چیئرمین وزیر اعلیٰ پنجاب ایڈوائزری کمیٹی برائے امراض قلب ڈاکٹر فرقد عالمگیر، ایم ایس سید محمد حسین ساملی ہسپتال اینڈ نواز شریف کارڈیالوجی سنٹر ڈاکٹر قیصر محمود عباسی، ایگزیکٹو ڈائریکٹر راولپنڈی انسٹی ٹیوٹ آف کارڈیالوجی پروفیسر مسفراح، سی اینڈ ڈبلیو کے افسران و دیگر متعلقہ افسران نے شرکت کی۔

صوبائی وزیر صحت خواجہ سلمان رفیق نے کہاکہ وزیر اعلیٰ پنجاب مریم نواز شریف عوام کی دہلیز پر بہترین اور جدید کارڈیک سہولیات فراہم کرنا چاہتی ہیں۔انشاء اللہ اگلے ہفتے سے نواز شریف کارڈیالوجی سنٹر مری میں سرجریز کا آغاز کر دیا جائے گا۔ڈیڑھ سال کے قلیل عرصہ کے دوران عوام تک بہترین کارڈیک سہولیات کی فراہمی کا کریڈٹ وزیر اعلیٰ پنجاب اور حکومت پنجاب کو جاتا ہے۔

خواجہ سلمان رفیق نے کہاکہ مری و گردونواح کی عوام کو کارڈیک کی جدید سہولیات فراہم کرنے جا رہے ہیں۔اجلاس کے دوران اس ادارے کیلئے طبی سامان و ایچ آر کی تازہ صورتحال کا جائزہ لیا گیا ہے۔وزیرصحت پنجاب نے کہاکہ سید محمد حسین ساملی ہسپتال اینڈ نواز شریف کارڈیالوجی سنٹر انشاء اللہ مری و گردونواح کیلئے ایک بہترین علاج گاہ ثابت ہو گا۔حکومت پنجاب کارڈیک کے تمام پراجیکٹس کیلئے تاریخ میں پہلی بار کروڑوں روپوں کی جدید مشینری خرید رہی ہے۔