وزیراعلی سندھ مراد علی شاہ سے بنگلہ دیش کے سیکریٹری داخلہ کی ملاقات

کراچی اور ڈھاکا کے درمیان براہ راست پرواز اور فیری سروس شروع کرنے کی ضرورت پر اتفاق

جمعرات 25 ستمبر 2025 18:58

وزیراعلی سندھ مراد علی شاہ سے بنگلہ دیش کے سیکریٹری داخلہ کی ملاقات

کراچی (اُردو پوائنٹ اخبارتازہ ترین - این این آئی۔ 25 ستمبر2025ء)وزیر اعلی سندھ سید مراد علی شاہ نے بنگلہ دیش کے سیکریٹری داخلہ نسیم الغنی اور ہائی کمشنر اقبال حسین خان سے ملاقات کے دوران اس بات پر اتفاق کیا کہ کراچی اور ڈھاکا کے درمیان براہِ راست پرواز اور فیری سروس شروع کرنے کی فوری ضرورت ہے تاکہ تجارت اور عوامی روابط کو فروغ دیا جا سکے۔

ملاقات میں کراچی اور بنگلہ دیش کے درمیان براہِ راست پروازوں کے آغاز کے امکانات پر بھی بات ہوئی۔ وزیر اعلی مراد علی شاہ نے کہا کہ اس طرح کے روابط سے اقتصادی تعلقات مضبوط ہوں گے۔ بنگلہ دیشی سیکریٹری نے یاد دلایا کہ ایک نجی کمپنی نے حال ہی میں براہِ راست شپنگ سروس شروع کی تھی لیکن وہ بعد میں بند ہو گئی۔ انہوں نے وزیر اعلی سندھ سے درخواست کی کہ اسے وفاقی سطح پر دوبارہ شروع کرانے میں مدد فراہم کریں۔

(جاری ہے)

شہری سلامتی کے حوالے سے گفتگو کرتے ہوئے وزیر اعلی نے کہا کہ کراچی جسے کبھی دنیا کے خطرناک ترین شہروں میں شمار کیا جاتا تھا، اب عالمی کرائم انڈیکس میں 85ویں نمبر پر ہے جو کہ ایک نمایاں بہتری ہے۔وزیر اعلی نے کہا کہ جرائم پر قابو پانے اور امن و امان بہتر بنانے کے لیے ہماری کوششوں نے نتائج دیے ہیں تاہم کچھ چیلنجز اب بھی باقی ہیں جنہیں سیف سٹی منصوبے کے مکمل طور پر فعال ہونے کے بعد حل کر لیا جائے گا۔

وزیر اعلی نے وفد کو بتایا کہ پولیس سربراہ کے دفتر میں ایک کمانڈ اینڈ کنٹرول سینٹر قائم کیا گیا ہے جو مصنوعی ذہانت کے ذریعے چلتا ہے، اور گاڑیوں کے نمبر پلیٹ پڑھنے اور چہروں کی شناخت کرنے کی صلاحیت رکھتا ہے۔بنگلہ دیشی سیکریٹری داخلہ نسیم الغنی نے کمانڈ اینڈ کنٹرول سینٹر کا دورہ کیا اور سندھ کے تجربے سے فائدہ اٹھانے میں گہری دلچسپی ظاہر کی۔ انہوں نے کہا کہ بنگلہ دیش اپنی سیف سٹی حکمتِ عملی کے لیے سندھ حکومت سے تعاون حاصل کرے گا۔ملاقات میں صوبائی سیکریٹری داخلہ اقبال میمن، انسپکٹر جنرل پولیس غلام نبی میمن اور وزیر اعلی کے سیکریٹری عبد الرحیم شیخ بھی موجود تھے۔