پاکستان اور اٹلی کی شراکت داری باہمی احترام اور مسلسل بڑھتے تعاون پر قائم ہے، چیئرمین سینیٹ سید یوسف رضا گیلانی

جمعرات 25 ستمبر 2025 17:06

اسلام آباد (اُردو پوائنٹ اخبارتازہ ترین - اے پی پی۔ 25 ستمبر2025ء) چیئرمین سینیٹ سید یوسف رضا گیلانی نے پاکستان اور اٹلی کے درمیان دیرینہ، گرمجوش اور خوشگوار تعلقات کی توثیق کرتے ہوئے کہا ہےکہ دونوں ممالک کی شراکت داری باہمی احترام اور مسلسل بڑھتے تعاون پر قائم ہے۔ انہوں نے یہ بات پاکستان-اٹلی پارلیمانی فرینڈشپ گروپ کے چیئرمین سینیٹر سرمد علی کی جانب سے اٹلی کی سفیر برائے پاکستان مارلینا آرمیلن کے اعزاز میں دیے گئے ظہرانے سے خطاب کرتے ہوئے کہی۔

چیئرمین سینیٹ نے کہا کہ اٹلی یورپی یونین میں پاکستان کے بڑے تجارتی شراکت داروں میں سے ایک ہے جس سے معاشی اور سیاسی تعلقات کو مزید مستحکم بنانے کی ضرورت اور بھی بڑھ جاتی ہے۔ انہوں نے اٹلی میں مقیم پاکستانی برادری کے کردار کو سراہا جو دونوں ممالک کے درمیان پل کا کردار ادا کر رہی ہے۔

(جاری ہے)

اٹلی کی سفیر نے دونوں ملکوں کے ایوانوں میں قائم پارلیمانی فرینڈشپ گروپس کے کام کو سراہا اور اٹلی کی پارلیمان میں اٹلی-پاکستان فرینڈشپ گروپ کی چیئرپرسن سارا فیراری کی جانب سے نیک تمنائوں کا پیغام پہنچایا۔

انہوں نے امید ظاہر کی کہ سارا فیراری جلد ہی پاکستان کا دورہ کریں گی۔ سفیر نے کہا کہ چیئرمین سینیٹ اور سینیٹ وفود نے گزشتہ برس اٹلی کے دو دورے کیے اور یقین ظاہر کیا کہ اٹلی کی پارلیمان اور سینیٹ کے اراکین بھی خیرسگالی کے ایسے ہی دورے کر کے دوطرفہ تعلقات کو مزید گہرا کریں گے۔سینیٹر سرمد علی نے اپنے خطاب میں معزز سفیر کا شکریہ ادا کیا اور پارلیمانی وفود کے تبادلوں کو قریبی تعاون کے فروغ میں اہم قرار دیا۔

انہوں نے امید ظاہر کی کہ دونوں فرینڈشپ گروپس کے درمیان مسلسل روابط پارلیمانی سفارت کاری کو مضبوط بنائیں گے اور پاکستان-اٹلی شراکت داری کو مزید مستحکم کریں گے۔ظہرانے میں وفاقی وزیر قانون سینیٹر اعظم نذیر تارڑ، وزیر مملکت برائے قانون بیرسٹر عقیل ملک، رکن قومی اسمبلی سید نوید قمر، سینیٹر شہادت اعوان اور چیئرمین سینیٹ کے مشیر و سفیر پارلیمانی سپیکرز کانفرنس مصباح کھر بھی شریک تھے۔\932