دشت،دھماکے سے متاثرہ ریلوے ٹریک کلیئر نہ ہوسکا، ٹرین آپریشن بند رہا

جمعرات کو کوئٹہ سے پشاور جانے والی اور پشاور سے کوئٹہ آنے والی جعفر ایکسپریس کو منسوخ کردیا گیا

جمعرات 25 ستمبر 2025 20:35

مستونگ (اُردو پوائنٹ اخبارتازہ ترین - این این آئی۔ 25 ستمبر2025ء)مستونگ کے علاقے دشت میں ریلوے ٹریک پر دھماکے کے 28 گھنٹوں بعد بھی ٹریک تاحال بحال نہیں ہوسکا۔ حکام نے بتایا کہ دھماکے کے بعد ٹریک سے اترنے والی بوگیوں کو اٹھانے اور ٹریک مرمت کا آپریشن دن کو بدستورجاری رہا۔

(جاری ہے)

رپورٹ کے مطابق 28گھنٹے گزرنے کے باوجود ریلوے حکام ٹریک کلیئر نہیں کرسکے جس کے باعث کوئٹہ سے ٹرین آپریشن جمعرات کو بھی بند رہے گا۔

دوسری جانب جمعرات کو کوئٹہ سے پشاور جانے والی اور پشاور سے کوئٹہ آنے والی جعفر ایکسپریس کو منسوخ کردیا گیا۔ واضح رہے کہ 23 ستمبر کو بلوچستان کے ضلع مستونگ کے علاقے دشت میں ریلوے ٹریک پر دھماکے کے بعد پشاور سے کوئٹہ آنے والی جعفر ایکسپریس کی 5 بوگیاں پٹری سے اترگئی تھیں جس کے نتیجے میں 5 مسافر زخمی بھی ہوئے تھے۔