Live Updates

شاہین آفریدی نے ٹی 20 کرکٹ میں 10واں مین آف دی میچ ایوارڈ اپنے نام کر لیا

جمعہ 26 ستمبر 2025 14:40

دبئی (اُردو پوائنٹ اخبارتازہ ترین - این این آئی۔ 26 ستمبر2025ء)پاکستان کرکٹ ٹیم کے مایہ ناز فاسٹ بولر شاہین شاہ آفریدی نے ٹی ٹوئنٹی انٹرنیشنل کرکٹ میں ایک اور سنگِ میل عبور کر لیا۔ایشیا کپ ٹی ٹوئنٹی کے سپر فور مرحلے میں کھیلے گئے سنسنی خیز مقابلے میں پاکستان نے بنگلادیش کو 11 رنز سے شکست دے کر فائنل تک رسائی حاصل کی۔136 رنز کے ہدف کے تعاقب میں بنگلادیشی ٹیم مقررہ 20 اوورز میں 9 وکٹوں کے نقصان پر صرف 124 رنز ہی بنا سکی۔

(جاری ہے)

پاکستان کی جانب سے شاہین آفریدی نے شاندار بولنگ کا مظاہرہ کرتے ہوئے 17 رنز کے عوض 3 کھلاڑیوں کو پویلین کی راہ دکھائی اور مین آف دی میچ قرار پائے۔اس کے علاوہ انہوں نے بلے بازی میں بھی بھرپور کردار ادا کیا اور صرف 13 گیندوں پر 19 قیمتی رنز اسکور کیے جس میں 2 بلند و بالا چھکے بھی شامل تھے۔یہ شاہین شاہ آفریدی کے کیریئر کا ٹی ٹوئنٹی انٹرنیشنل میں دسواں مین آف دی میچ ایوارڈ ہے، جس کے ساتھ ہی وہ اس فارمیٹ میں سب سے زیادہ یہ اعزاز حاصل کرنے والے فاسٹ بولر بن گئے ہیں۔