Live Updates

جرمانہ 300 فیصد بھی ہو تو قوم حارث کیساتھ ہے، ناصر شاہ کا فاسٹ بولر کا جرمانہ ادا کرنیکا اعلان

حارث رؤف اور صاحبزادہ فرحان بہادر انسان ہیں، جرمانہ اگر 300 فیصد بھی ہو تو ہم اور پوری قوم حارث رؤف کے ساتھ کھڑے ہیں: صوبائی وزیر

ذیشان مہتاب اتوار 28 ستمبر 2025 12:29

جرمانہ 300 فیصد بھی ہو تو قوم حارث کیساتھ ہے، ناصر شاہ کا فاسٹ بولر کا ..

کراچی (اردو پوائنٹ تازہ ترین اخبار ۔ 28 ستمبر 2025ء ) پیپلزپارٹی رہنما اور سندھ کے وزیر بلدیات ناصر حسین شاہ نے حارث رؤف پر آئی سی سی کی جانب سے کیا گیا جرمانہ ادا کرنے کا اعلان کیا ہے۔

سوشل میڈیا سائٹ ایکس پر کی گئی پوسٹ میں ناصر حسین شاہ نے لکھا کہ حارث رؤف اور صاحبزادہ فرحان بہادر انسان ہیں، حارث پر جرمانہ اگر 300 فیصد بھی ہو تو ہم اور پوری قوم اس کے ساتھ کھڑے ہیں۔

وزیر بلدیات سندھ نے مزید کہا کہ حارث رؤف کے جرمانے کی رقم میں اپنی جیب سے حارث کو دوں گا۔

اس سے قبل ذرائع کی جانب سے یہ خبر آئی تھی کہ چیئرمین پی سی بی محسن نقوی نے بھی کہا تھا کہ حارث رؤف پر عائد جرمانےکی رقم وہ اپنی جیب سے ادا کریں گے۔

واضح رہے کہ ایشیا کپ میں 21 ستمبر کو بھارت کے خلاف میچ میں صاحبزادہ فرحان نے ففٹی اسکور کرنے کے بعد خوشی کا اظہار کرتے ہوئے بلےکو بناوٹی گن بنا کر فائر کرنےکا اشارہ کیا تھا۔

(جاری ہے)

ان کے علاوہ فاسٹ بولر حارث رؤف نے میچ کے دوران وکٹ لینے کے بعد اور باؤنڈری لائن کے قریب فیلڈنگ کرتے ہوئے بھارتی تماشائیوں کی ہوٹنگ کا جواب دیتے ہوئے طیارہ تباہ ہونے کا اشارہ کیا تھا۔ گزشتہ روز کرکٹ ویب سائٹ نے دعویٰ کیا تھا کہ میچ ریفری نے حارث رؤف کو آئی سی سی کوڈ آف کنڈکٹ کی خلاف ورزی کا مرتکب قرار دیتے ہوئے ان پر میچ فیس کا 30 فیصد جرمانہ عائدکیا جب کہ صاحبزادہ فرحان کے خلاف کوئی کارروائی نہیں کی اور انہیں وارننگ دیکر چھوڑ دیا گیا۔