ایشیاء کپ فائنل، بھارت کا پاکستان کیخلاف ٹاس جیت کر باولنگ کا فیصلہ

دبئی (اردو پوائنٹ تازہ ترین اخبار ۔ 28 ستمبر 2025ء ) ایشیاء کپ 2025ء کے فائنل میچ میں بھارت نے پاکستان کیخلاف ٹاس جیت کر پہلے باولنگ کرنے کا فیصلہ کیا ہے۔ روایتی حریفوں کے درمیان یہ ٹاکرا مقامی وقت کے مطابق شام ساڑھے سات بجے شروع ہو گا۔ پاکستانی ٹیم کی قیادت سلمان علی آغا کریں گے اور انہیں فخر زمان، شاہین شاہ آفریدی، حارث رؤف، ابرار احمد، محمد نواز جیسے باصلاحیت کھلاڑیوں کی خدمات حاصل ہیں۔

بھارت کو سوریا کمار یادیو لیڈ کریں گے، شبمن گل، جسپریت بمراہ، ہاردیک پانڈیا، ابھیشیک شرما اور کلدیپ یادیو جیسے تجربہ کار کھلاڑی بھارتی اسکواڈ کا حصہ ہیں۔ بھارتی ٹیم ٹورنامنٹ میں ناقابل شکست ہے جبکہ گرین شرٹس نے شاندار کم بیک کرتے ہوئے فائنل کے لیے کوالیفائی کیا ہے اور پاکستانی کھلاڑی اس بار ناکامیوں کا حساب برابر کرنے کے لیے پرعزم ہیں۔

(جاری ہے)

کرکٹ ماہرین کے مطابق پاکستان کو ٹائٹل اپنے نام کرنے کے لیے غیر معمولی کارکردگی دکھانا ہو گی۔ شائقین کرکٹ پرامید ہیں کہ یہ میچ روایتی حریفوں کے درمیان ایک اور یادگار مقابلہ ثابت ہو گا۔ پاکستان کے کپتان سلمان علی آغا کے مطابق ایشیا کپ کے فائنل کیلئے جو وکٹ تیار کی گئی اس کا کوچ اور فہیم اشرف نے جائزہ لیا ہے، وکٹ پاک بھارت گزشتہ 2 میچز جیسی ہی ہے۔

دبئی میں پریس کانفرنس کرتے ہوئے سلمان علی آغا کا کہنا تھا کہ پچھلے میچز میں توقعات کے مطابق کارکردگی نہیں دکھا سکے، ہو سکتا ہے کھلاڑیوں نے اپنی بہترین کارکردگی فائنل کے لیے بچا کر رکھی ہو۔ اُنہوں نے کہا کہ بھارتی میڈیا کیا کہہ رہا ہے، اس سے کوئی غرض نہیں، ہماری ساری توجہ اپنی کارکردگی پر ہے، ایشیا کپ فائنل کیلئے تیار رہیں، اُمید ہے اچھے نتائج دیں گے، انشااللہ کل پاکستان کو جیتتے ہوئے دیکھیں گے۔

قومی ٹیم کے کپتان کا کہنا تھا کہ ہماری کوشش ہے کہ اپنی بہترین کرکٹ کھیلیں ، اگرچالیس اوور تک پلان پرعمل کیا توکسی ٹیم کو بھی ہرا سکتے ہیں، صائم ایوب اگلے دس سال تک ٹیم کے کام آ سکتا ہے، صائم نے فیلڈنگ اور بولنگ میں اچھی پرفارمنس دی، توقع ہے صائم فائنل میں اچھی بیٹنگ کریں گے۔ سلمان آغا نے کہا کہ گراؤنڈ سے باہر کی چیزوں کو کنٹرول نہیں کرسکتے ،ہمارا ہدف ایشیاکپ جیتنا ہے، اِسی کے لیے میدان میں اتریں گے، کبھی نہیں دیکھا کہ دوٹیموں میں ہینڈ شیک نہ ہوا ہو، کبھی میرے والد نے بھی ایسی بات نہیں بتائی کہ ہینڈشیک نہیں ہوا، پہلے بھی پاک بھارت میچز ہوئے، حالات خراب ہونے کے باوجود ہینڈشیک ہوئے، ہینڈ شیک نہ ہونا کرکٹ کے لیے اچھا نہیں ۔

انہوں نے کہا کہ پہلے سپنرز کو زیادہ مدد مل رہی تھی ،اسی لیے سپنرز پر زیادہ انحصار کیا، اگرکوئی گراؤنڈ میں جارحانہ انداز دکھانا چاہتا ہے کوئی مسئلہ نہیں ، فاسٹ بولرز سے اگر اُس کا جارحانہ پن چھین لیں تو کچھ بچتا ہی نہیں، ہر کھلاڑی کو پتہ کہ جذبات کو کیسے قابو رکھنا ہے، ہرکھلاڑی کو جذبات کے اظہار کا حق ہے بس کسی کی توہین نہ کرے۔