ایف آئی اے میں کرپٹ عناصر کے خلاف سخت کارروائی، پانچ افسران کو سزائیں

جمعہ 26 ستمبر 2025 17:08

اسلام آباد (اُردو پوائنٹ اخبارتازہ ترین - آن لائن۔ 26 ستمبر2025ء) وفاقی تحقیقاتی ادارے (ایف آئی ای) میں احتساب کا عمل مزید سخت کر دیا گیا ہے۔ ڈائریکٹر جنرل ایف آئی اے رفعت مختار راجہ کی زیر صدارت اردلی روم کے دوران بدعنوانی، کرپشن اور ناقص تفتیش میں ملوث افسران کے خلاف محکمانہ کارروائی عمل میں لائی گئی۔کارروائی کے دوران کرپشن اور ناقص تفتیش میں ملوث دو انسپکٹرز اور دو سب انسپکٹرز کو نوکری سے برخاست کر دیا گیا، جبکہ ایک خاتون انسپکٹر کو ناقص تفتیش پر سب انسپکٹر کے عہدے پر تنزلی کی سزا دی گئی۔

یہ افسران اسلام آباد، کراچی اور لاہور زون میں تعینات تھے۔ڈی جی ایف آئی اے نے واضح کیا ہے کہ ادارے میں کرپشن، غفلت اور ناقص تفتیش کے مرتکب اہلکاروں کے لیے کوئی جگہ نہیں۔

(جاری ہے)

انہوں نے کہا کہ ایف آئی اے کو کرپشن اور کالی بھیڑوں سے پاک کرنے کے لیے سخت احتسابی عمل جاری ہے، اور یہ عمل بلاامتیاز جاری رکھا جائے گا۔ ان کا کہنا تھا کہ غیر قانونی سرگرمیوں میں ملوث اہلکاروں کے خلاف سخت اقدامات کیے جا رہے ہیں، کیونکہ صرف مؤثر احتسابی نظام ہی انسانی سمگلنگ، بدعنوانی اور عوامی اعتماد کے بحران کا خاتمہ کر سکتا ہے۔ ڈی جی ایف آئی اے نے اس عزم کا اعادہ کیا کہ غفلت کے مرتکب افسران کو قانون کے مطابق قرار واقعی سزا دی جائے گی۔