مخصوص عازمین کے حوالے سے وزارت مذہبی امور کی نئی پالیسی سامنے آگئی

فوتگی یا کسی دیگر مجبوری کے باعث حج پر نہ جانے والے فرد کا کوئی بھی رشتے دار حج پر جانے کا اہل ہوگا

ساجد علی جمعہ 26 ستمبر 2025 16:41

اسلام آباد ( اُردو پوائنٹ اخبارتازہ ترین۔ 26 ستمبر2025ء ) مخصوص عازمین کے حوالے سے وزارت مذہبی امور کی نئی پالیسی سامنے آگئی۔ میڈیا رپورٹس کے مطابق فوت یا شدید بیمارعازمین کے حوالے سے وزارت مذہبی امورکی نئی پالیسی سامنے آئی ہے، جس کے تحت کسی بھی مجبوری کے باعث حج پر جانے سے رہ جانے والے یا فوتگی کی صورت میں ان افراد کا کوئی بھی دوسرا رشتے دار حج پر جانے کا اہل ہوگا۔

بتایا گیا ہے کہ مجبوری کی وجہ سے حج پر نہ جانے والا شخص ناصرف کسی کو بھی نامزد کرسکتا ہے بلکہ بوجہ مجبوری حج پر نہ جا پانے والے شخص کو رقم واپس لینے کا بھی اختیار حاصل ہوگا، تاہم رقم واپسی یا متبادل شخص کو حج پر بھجوانے کے لیے ٹھوس وجہ بتاناہوگی، رجسٹرڈ حاجی کی بیماری یا انتقال کا دستاویزی ثبوت بھی لازمی قراردیا گیا ہے، حج پر نہ جانے کی وجہ درج کرکے اسٹیمپ پیپرجمع کرانا ہوگا، درخواست کے ہمراہ بینک رسید اور شناختی کارڈ کی کاپی بھی دینا ہوگی۔

(جاری ہے)

بتایا جارہا ہے کہ میڈیکل بنیادوں یا کسی اور وجہ سے حج پر نہ جانے والے درخواست گزاروں کو حج رجسٹریشن کے دوران جمع کرائی گئی رقوم کی واپسی کا فیصلہ بھی کیا گیا ہے، وزارت مذہبی امور نے اس سلسلے میں سرٹیفکیٹ جاری کر دیا ہے جس کے تحت متاثرہ عازمین رقوم کی واپسی کے لیے درخواست دے سکتے ہیں ، سرٹیفکیٹ میں درج شرائط کے تحت درخواست گزار کا شناختی کارڈ لازمی ہوگا، بینک میں جمع کرائی گئی پہلی قسط کی رسید بھی درکار ہوگی اور اگر درخواست گزار وفات پا چکے ہوں تو ڈیتھ سرٹیفکیٹ پیش کرنا ہو گا، اس کے علاوہ میڈیکل رپورٹس اور دیگر متعلقہ کوائف بھی جمع کرانے ہوں گے، رقم کی واپسی کے لیے عازمین کو وزارت مذہبی امور کے اکائونٹس آفیسر کے نام درخواست دینا ہو گی۔