سعودی کابینہ کا غیرملکیوں کے اہل خانہ کی ملازمت سے متعلق نئے ضوابط مرتب کرنے کا فیصلہ

ہفتہ 27 ستمبر 2025 10:20

ریاض (اُردو پوائنٹ اخبارتازہ ترین - اے پی پی۔ 27 ستمبر2025ء) سعودی کابینہ نے مملکت میں اپنے اہل خانہ کے ہمراہ مقیم غیرملکیوں کے بچوں کی ملازمت کے حوالے سے نئے ضوابط متعین کیے ہیں،اس ضمن میں وزیر افرادی قوت و سماجی ترقی کو نکات مرتب کرنے کا اختیار تفویض کردیا گیا ہے۔اردو نیوز کے مطابق سعودی کابینہ نے 22 شعبان 1444 ہجری کے اپنے فیصلہ نمبر585 میں ترمیم کرتے ہوئے وزیر افرادی قوت کو اختیار دیا کہ وہ مملکت میں قانونی طورپر کام کرنے والے غیرملکیوں کے بچوں کی ملازمت کے بارے میں وسیع بنیادوں پر ضوابط مرتب کریں جس میں ان امور کا خیال رکھا جائے کہ وہ پیشے فہرست میں شامل نہ ہوں جو مقامی افراد کے لیے مخصوص ہیں۔

کابینہ کے فیصلے میں کی گئی ترمیم میں یہ بھی کہا گیا ہے کہ مرافقین (غیرملکیوں کے اہل خانہ) کی ملازمت کو قانونی دائرے میں لانے کےلیے فیس کا تعین وزارتِ خزانہ اور تیل کے ماسوا ذرائع آمدنی کو بڑھانے والے مرکز کے ساتھ مل کرمشاورت سے طے کیا جائے ۔

(جاری ہے)

غیرملکیوں کے اہل خانہ پر ملازمت فیس کا تعین عام کارکن پر مقرر فیس کو دیکھ کر کیا جائے گا، یعنی جو فیس عام کارکن کے ورک پرمٹ پر لی جاتی ہے اسے مدنظر رکھتے ہوئےمرافق کے لیے ورک پرمٹ کی فیس مقرر کی جائےگی۔

خیال رہے کہ مملکت میں قانونی طور پر مقیم غیرملکی جو اپنے اہل خانہ کے ہمراہ مقیم ہیں انہیں کام کرنے کی اجازت نہیں ہوتی۔ غیرملکیوں کے اہل خانہ پر(فی فرد) 400 ریال ماہانہ فیس مقرر ہے جس کی ادائیگی تین ، چھ ، نو اور 12 ماہ کے حساب سے اپنی سہولت کے مطابق کی جاسکتی ہے۔