اسلام آباد،15سالہ لڑکی کے اغواء کا کیس، ملزمہ اسما کی ضمانت کی درخواست خارج

عدالت نے پولیس کو تفتیش مکمل کرکے چالان عدالت میں پیش کرنے کا حکم دے دیا

ہفتہ 27 ستمبر 2025 20:45

اسلام آباد(اُردو پوائنٹ اخبارتازہ ترین - این این آئی۔ 27 ستمبر2025ء)اسلام آباد میں تھانہ شالیمار کی حدود سے 15سالہ لڑکی کے اغواء کے کیس میں مقامی عدالت نے ملزمہ اسما آصف کی ضمانت قبل از گرفتاری کی درخواست خارج کر دی اور پولیس کو تفتیش مکمل کرکے چالان عدالت میں پیش کرنے کا حکم دے دیا ۔

(جاری ہے)

ایڈیشنل اینڈ سیشن جج کے تحریری فیصلے کے مطابق ملزمہ اسما پر لڑکی کو ورغلا کر اغواء کرانے کا الزام ہے،متاثرہ لڑکی نے اپنے بیان میں واضح طور پر اسما آصف کو ملزمہ بتایا، کوئی نکاح نامہ ریکارڈ پرموجود نہیں، ملزمہ کو جرم سے جوڑنے کا کافی مواد موجود ہے۔

فیصلے کے مطابق ضمانت قبل از گرفتاری ایک غیر معمولی ریلیف ہے، یہ ریلیف صرف اس صورت میں ملتا ہے جب مدعی کی بدنیتی یا جھوٹ واضح نہ ہو، لیکن یہاں ایسا کچھ ثابت نہیں ہوا۔ عدالت نے پولیس کو تفتیش مکمل کرکے چالان پیش کرنے کا حکم دے دیا۔ ملزمہ اسما آصف کے خلاف متاثرہ لڑکی کے والد کی مدعیت میں مقدمہ درج کیا گیا تھا۔