Live Updates

انکم ٹیکس ریٹرن فائل کرنے کی آخری تاریخ میں توسیع نہیں کی جائے گی، ایف بی آر

پیر 29 ستمبر 2025 14:41

اسلام آباد (اُردو پوائنٹ اخبارتازہ ترین - اے پی پی۔ 29 ستمبر2025ء) فیڈرل بورڈ آف ریونیو (ایف بی آر) نے واضح کیاہے کہ ٹیکس سال 2025 کے لیے انکم ٹیکس ریٹرن فائل کرنے کی مقررہ تاریخ میں کوئی توسیع نہیں کی جائے گی۔پیرکویہاں جاری بیان میں ترجمان ایف بی آرنے کہاہے کہ ایف بی آرنے جو مختلف میڈیا پلیٹ فارمز پر گردش کرنے والی ان بے بنیادخبروں کانوٹس لیاہے جن میں دعویٰ کیا جا رہا ہے کہ ٹیکس سال 2025 کے لیے انکم ٹیکس ریٹرن فائل کرنے کی آخری تاریخ میں توسیع کی جائے گی،بعض عناصر نے اس مبینہ توسیع کو حالیہ سیلاب سے بھی جوڑنے کی کوشش کی ہے۔

ترجمان نے واضح کیاہے کہ یہ خبریں سراسر جھوٹی، بے بنیاد اور گمراہ کن ہیں، ٹیکس سال 2025 کے لیے انکم ٹیکس ریٹرن فائل کرنے کی مقررہ تاریخ میں کوئی توسیع نہیں کی جائے گی۔

(جاری ہے)

انہوں نے کہاکہ کہ زیادہ تر ٹیکس دہندگان ایسے علاقوں میں رہائش پذیر ہیں جو سیلاب سے متاثر نہیں ہوئے، اور ان کے پاس اپنی قومی ذمہ داری ادا کرنے کے لیے مناسب وقت موجود رہا ہے۔

ترجمان نے کہاکہ ایف بی آر کے آئرس سسٹم کی سست روی سے متعلق خبریں بھی غلط ہیں۔ آئرس پورٹل مکمل طور پر فعال اوربلاتعطل کام کر رہا ہے، ٹیکس دہندگان آسانی سے نیا سادہ ریٹرن فارم استعمال کرتے ہوئے اپنی ریٹرن فائل کر سکتے ہیں۔ترجمان نے تمام ٹیکس دہندگان کو متنبہ کیا ہے کہ مقررہ تاریخ کے بعد ریٹرن فائل نہ کرنے کی صورت میں انہیں لیٹ فائلر تصور کیا جائے گا اور قانون کے مطابق جرمانے عائد کیے جائیں گے۔

ترجمان نے بتایا کہ ایف بی آر تمام اہل ٹیکس دہندگان سے پرزور اپیل کرتا ہے کہ وہ ذمہ داری کا مظاہرہ کرتے ہوئے 30 ستمبر 2025 کی آخری تاریخ سے پہلے ایمانداری اور درستگی کے ساتھ اپنی انکم ٹیکس ریٹرن فائل کریں تاکہ کسی بھی قانونی کارروائی سے بچا جا سکے،اگر کسی ٹیکس دہندہ کو شدید مجبوری یا مشکلات کا سامنا ہو تو وہ قانون کے مطابق متعلقہ کمیٹی کی منظوری سے مقررہ ٹیکس جمع کروانے کی شرط پر ریٹرن فائل کرنے کی تاریخ میں پندرہ دن تک کی توسیع حاصل کر سکتا ہے۔