پنجاب لائبریری فائونڈیشن بورڈ آف گورنرز کا اجلاس، مالی سال2025-26 کیلئے بجٹ تخمینہ منظور

پیر 29 ستمبر 2025 16:31

لاہور (اُردو پوائنٹ اخبارتازہ ترین - اے پی پی۔ 29 ستمبر2025ء) پنجاب لائبریری فائونڈیشن بورڈ آف گورنرز کا اہم اجلاس قائداعظم لائبریری میں چیئرمین بورڈ جاوید اسلم کی صدارت میں منعقد ہوا،جس میں مالی سال2025-26 کیلئے بجٹ تخمینہ منظور کیا گیا۔اجلاس میں بچوں میں کتب بینی اور داستان گوئی کے فروغ کیلئے خصوصی پروگرامز کا اعلان کیا گیا،جو علم و ادب کے شعبے میں نئی روح ڈالنے کیلئے اہم قدم ہے۔

چیئرمین جاوید اسلم نے اجلاس کے دوران کہا کہ یہ فیصلے علم و ادب کے فروغ کیلئے بورڈ کی پختہ عزم کی عکاسی کرتے ہیں۔

(جاری ہے)

انہوں نے کہا کہ بورڈ اس بات کو یقینی بنائے گا کہ ہر اقدام تعلیم و تحقیق کے معیار کو بہتر بنانے کیلئے ہو۔اجلاس میں سیکرٹری علی بہادر قاضی نے انڈوومنٹ فنڈ کے شفاف استعمال پر بریفنگ دی جبکہ ڈائریکٹر عبد الرحمن آصف نے لائبریریوں کے فنڈز اور اہداف پر پریزنٹیشن دی۔

اس موقع پر سابق ڈی جی پی آر اطہر علی خان، کنول آمین، شاہد حسین، نوشین فاطمہ اور رخشندہ کوکب سمیت دیگر اراکین بھی موجود تھے۔اجلاس کا مقصد علم و ادب کی ترقی کیلئے عملی منصوبہ بندی کرنا اور لائبریری کی خدمات کو مزید موثر بنانا تھا،تاکہ نوجوان نسل کو کتابوں سے محبت پیدا ہو اور وہ اپنی تعلیمی صلاحیتوں کو مزید نکھار سکیں۔