تمام محکمے جنوری تک منظور شدہ سکیموں کی تکمیل ہر صورت یقینی بنائیں ، میر سرفراز بگٹی

کوئٹہ(اُردو پوائنٹ اخبارتازہ ترین - این این آئی۔ 29 ستمبر2025ء)وزیر اعلیٰ بلوچستان میر سرفراز بگٹی کی زیر صدارت پبلک سیکٹر ڈویلپمنٹ پروگرام پر عملدرآمد کے حوالے سے اعلیٰ سطح کا اجلاس پیر کو یہاں چیف منسٹر سیکرٹریٹ میں منعقد ہوا اجلاس میں صوبائی وزیر ترقیات و منصوبہ بندی میر ظہور احمد بلیدی، وزیر مواصلات و تعمیرات میر سلیم خان کھوسہ، وزیر تعلیم راحیکہ حمید خان درانی، چیف سیکرٹری بلوچستان شکیل قادر خان اور تمام محکموں کے انتظامی سیکرٹریز شریک ہوئے ایڈیشنل چیف سیکرٹری منصوبہ بندی و ترقیات زاہد سلیم نے اجلاس کو جاری منصوبوں کی صورتحال پر تفصیلی بریفنگ دی وزیر اعلیٰ نے ترقیاتی منصوبوں کو تیزی سے مکمل کرنے والے محکموں کو سراہا جبکہ سست روی کا مظاہرہ کرنے والے اداروں پر برہمی کا اظہار کیا انہوں نے واضح ہدایت دی کہ تمام محکمے جنوری تک منظور شدہ اسکیموں کی تکمیل ہر صورت یقینی بنائیں تاکہ عوامی فلاحی منصوبوں کے ثمرات بروقت پہنچ سکیں اجلاس کو بتایا گیا کہ گرین بس منصوبے کی توسیع پر کام تیزی سے جاری ہے اور نئی گرین بسوں کی خریداری مکمل ہوچکی ہے جو اکتوبر کے دوسرے ہفتے میں کراچی پورٹ پہنچ جائیں گی وزیر اعلیٰ نے ہدایت کی کہ گرین اور پنک بس منصوبوں کو اکتوبر میں ہر صورت مکمل کیا جائے۔

(جاری ہے)

انہوں نے کہا کہ شہریوں کو جدید سفری سہولت فراہم کرنے کے لیے گرین بسوں کی تعداد بڑھائی جائے گی جبکہ خواتین کے لیے خصوصی پنک بس سروس بھی جلد شروع کی جائے گی وزیر اعلیٰ بلوچستان نے خواتین کو معاشی طور پر بااختیار بنانے کے عزم کا اظہار کرتے ہوئے ورکنگ ویمن کے لیے آسان اقساط پر الیکٹرک بائیکس فراہم کرنے کا فیصلہ بھی کیا اٴْنہوں نے کہا کہ صوبائی حکومت چاہتی ہے کہ خواتین خود مختار اور سماجی و معاشی میدان میں فعال کردار ادا کریں وزیر اعلیٰ نے آئندہ بجٹ کے حوالے سے ہدایت دی کہ مئی تک تمام مجوزہ اسکیموں کی ٹیکنیکل اپروول مکمل کرلی جائے تاکہ بجٹ سازی میں کسی قسم کی تاخیر نہ ہو اور منظور شدہ اسکیمیں بجٹ کا حصہ بنائی جاسکیں انہوں نے کہا کہ ترقیاتی منصوبوں کی بروقت تکمیل اور معیار کی سخت نگرانی چیف منسٹر انسپیکشن ٹیم کے ذریعے یقینی بنائی جائے گی وزیر اعلیٰ بلوچستان میر سرفراز بگٹی نے کہا کہ بلوچستان کے عام آدمی کی مشکلات کم کرنا حکومت کی اولین ترجیح ہے تمام محکمے عوامی خدمت کو اپنا نصب العین بناتے ہوئے فعال اور ذمہ دارانہ کردار ادا کریں۔