چیف آف دی نیول سٹاف ہاکی ٹورنامنٹ میں ماری انرجیز اور پاکستان نیوی نے اپنے اپنے میچز جیت لیے

پیر 29 ستمبر 2025 21:41

لاہور (اُردو پوائنٹ اخبارتازہ ترین - اے پی پی۔ 29 ستمبر2025ء) نیشنل ہاکی سٹیڈیم لاہور میں جاری چوتھے چیف آف دی نیول سٹاف (سی این ایس) آل پاکستان ہاکی ٹورنامنٹ میں پیر کے روز ماری انرجیز اور پاکستان نیوی نے شاندار کھیل کا مظاہرہ کرتے ہوئے اپنے اپنے میچز جیت لیے۔پہلے میچ میں ماری انرجیز نے شاندار کھیل پیش کرتے ہوئے پاکستان رینجرز کو 5-2 سے شکست دی۔

فاتح ٹیم کے فارورڈ احمد ندیم نے یادگار ہیٹرک سکور کر کے میچ کا رخ پلٹ دیا، جبکہ وسیم اور عمر مصطفی نے ایک ایک گول کر کے فتح کو یقینی بنایا۔ رینجرز کی جانب سے ایم احمر اور شیروز نے ایک ایک گول سکور کیا۔ بہترین کارکردگی پر وسیم کو میچ کا بہترین کھلاڑی قرار دیا گیا۔ دوسرے میچ میں سخت اور سنسنی خیز مقابلے کے بعد پاکستان نیوی نے نیشنل بینک کو 3-2 سے شکست دی۔

(جاری ہے)

نیوی کی جانب سے یاسر خان، عبدالحنان شاہد اور بشارت علی نے گول کیے، جبکہ این بی پی کی طرف سے صابر اور آکاش نے ایک ایک گول سکور کیا۔ شاندار کھیل کے باعث یاسر خان کو میچ کا بہترین کھلاڑی قرار دیا گیا۔ اس موقع پر مہمانِ خصوصی اولمپیئن طاہر زمان نے کہا کہ ہاکی کا معیار ثابت کرتا ہے کہ قومی کھیل دوبارہ عروج کی جانب گامزن ہے۔ انہوں نے کہا کہ ماری انرجیز اور پاکستان نیوی نے غیر معمولی حکمت عملی اور نظم و ضبط کا مظاہرہ کیا جبکہ رینجرز اور این بی پی نے بھی بہترین مقابلہ کیا، جس سے ظاہر ہوتا ہے کہ پاکستانی ہاکی میں ٹیلنٹ کی کمی نہیں۔

انہوں نے مزید کہا کہ پاکستان نیوی قومی کھیل کی ترویج کے لیے جس طرح مسلسل تعاون فراہم کر رہی ہے وہ قابلِ ستائش اور دیگر اداروں کے لیے مثال ہے۔کل (منگل) کو کھیلے جانے والے میچز میں ماری انرجیز کا مقابلہ پی اے ایف سے ہوگا جبکہ کسٹمز اور پاکستان نیوی کی ٹیمیں آمنے سامنے آئیں گی۔