ملک بھر میں کریک ڈائون، کروڑوں روپے مالیت کی منشیات برآمد

پانچ ملزمان کو گرفتار کرکے مقدمات درج کرلیے گئے‘ ترجمان اے این ایف

بدھ 1 اکتوبر 2025 19:30

لاہور (اُردو پوائنٹ اخبارتازہ ترین - این این آئی۔ 01 اکتوبر2025ء) اینٹی نارکوٹکس فورس نے ملک کے مختلف شہروں میں منشیات اسمگلنگ کے خلاف کریک ڈائون کرتے ہوئے 5کارروائیوں کے دوران 5 ملزمان کو گرفتار کرلیا،کارروائیوں کے دوران مجموعی طور پر 271.7کلوگرام منشیات برآمد کی گئی جس کی مالیت 6کروڑ 20لاکھ روپے سے زائد بتائی جاتی ہے۔ترجمان اے این ایف کے مطابق حیدرآباد میں کارروائی کے دوران ایک ملزم کے قبضے سے 24کلوگرام چرس برآمد کی گئی۔

(جاری ہے)

شیر شاہ ٹول پلازہ ملتان کے قریب ٹرک میں موجود 1452سیبوں کے کارٹن سے 8 کلوگرام آئس برآمد ہوئی، جبکہ دو ملزمان کو گرفتار کیا گیا۔اسی طرح موٹر وے ٹول پلازہ اسلام آباد کے قریب گاڑی سے 3کلوگرام ہیروئن برآمد کر کے دو ملزمان کو گرفتار کیا گیا۔ کچلاک بائی پاس کوئٹہ کے قریب صحرائی علاقے سے 225کلوگرام افیون برآمد کی گئی جبکہ جیونی، گوادر میں جھاڑیوں سے 11.7کلوگرام ویڈ برآمد ہوئی۔ترجمان کے مطابق تمام کارروائیوں میں گرفتار ملزمان کے خلاف انسدادِ منشیات ایکٹ 1997ء کے تحت مقدمات درج کر کے مزید تحقیقات شروع کر دی گئی ہیں۔