جائزمطالبات پرعمل درآمد کریں گے، اعلی سطح مذاکراتی کمیٹی کی مظاہرین کو یقین دہانی

جمعرات 2 اکتوبر 2025 20:45

مظفر آباد (اُردو پوائنٹ اخبارتازہ ترین - این این آئی۔ 02 اکتوبر2025ء)وفاقی حکومت کی مذاکراتی کمیٹی مظفر آباد پہنچ گئی،کشمیری عوام کے مطالبات سننے اور حل کرنے کے عزم کا اظہار کیا۔ اعلی سطح کی مذاکراتی کمیٹی نے مظاہرین سے پرامن رہنے کی اپیل کرتے ہوئے کہا ہے کہ خطے کی صورت حال کو سمجھیں،جائزمطالبات پر عمل درآمد کریں گے۔وزیراعظم آزادکشمیر نے کمیٹی بنانے پراظہارتشکرکرتے ہوئے کہاشہبازشریف نے بہترین قدم اٹھایا،جومطالبات رہ گئے ان پر بات چیت ہوگی،تعطل دورکریں گے۔

احسن اقبال نے کہا کہ کچھ لوگ امن وامان کو سبوتاژ کرنا چاہتے ہیں،عوام کی مشکلات کم کرنے کیلئے ہر ممکن اقدامات کریں گے۔رانا ثنااللہ نے کہا ہمیں بیٹھ کرجائز مطالبات پر بات کرنا ہوگی،عوامی ایکشن کمیٹی سے ملکرتمام غلط فہمیاں دورکرلیں گے،پورا یقین ہیعوامی ایکشن کمیٹی کیدوستوں کے ساتھ بیٹھ کر تمام غلط فہمیوں کو سلجھا لیں گے،آزادکشمیر کے لوگ ہمارے بھائی ہیں۔

(جاری ہے)

امیر مقام نے کہا کہ ہماری خواہش ہے کہ آزادکشمیر کے عوام کے جائز مطالبات حل ہوں، احتجاج اورتشدد سے کچھ حاصل نہیں ہوتا، مسائل بیٹھ کر بات چیت سے حل ہوتے ہیں۔راجہ پرویز اشرف نے کہا مل بیٹھ کر تمام مسائل کا حل نکل سکتا ہے۔ پیپلزپارٹی قیادت معاملہ افہام وتفہیم سے حل کرنا چاہتی ہے۔