پی آئی اے کا 25 اکتوبر سے اسلام آباد سے مانچسٹر کی پروازیں شروع کرنے کا اعلان

مانچسٹر کی پروازوں میں بتدریج اضافہ کیا جائے گا اور دوسرے مرحلے میں لندن کی پروازیں بھی شروع کی جائیں گی؛ ترجمان

ساجد علی ہفتہ 4 اکتوبر 2025 12:08

پی آئی اے کا 25 اکتوبر سے اسلام آباد سے مانچسٹر کی پروازیں شروع کرنے ..

اسلام آباد ( اُردو پوائنٹ اخبارتازہ ترین۔ 04 اکتوبر2025ء ) قومی فضائی کمپنی پی آئی اے نے 25 اکتوبر سے اسلام آباد سے مانچسٹر کی پروازیں شروع کرنے کا اعلان کردیا۔ تفصیلات کے مطابق پاکستان انٹرنیشنل ایئرلائن ( پی آئی اے ) کی جانب سے برطانیہ کے لیے پروازیں 25 اکتوبر سے شروع کرنے کا اعلان کیا گیا ہے، اس حوالے سے جاری بیان میں ترجمان پی آئی اے نے بتایا کہ پہلے مرحلے میں اسلام آباد سے مانچسٹر کے لیے ہفتہ وار 2 پروازیں بروز ہفتہ اور منگل آپریٹ کی جائیں گی، شیڈول کے تحت پی ائی اے کی پرواز دن 12 بجے روانہ ہوگی اور شام 5 بجے مانچسٹر پہنچے گی، مانچسٹر سے پرواز شام 7 بجے روانہ ہوگی اور صبح 7 بجے اسلام آباد پہنچے گی۔

ترجمان نے مزید بتایا کہ مانچسٹر کی پروازوں میں بتدریج اضافہ کیا جائے گا اور دوسرے مرحلے میں لندن کی پروازیں بھی شروع کی جائیں گی، پروازیں بکنگ کے لیے کھول دی گئی ہیں اور اب مسافر 15 گھنٹے کی مسافت کی بجائے 8 گھنٹوں میں مانچسٹر پہنچ سکیں گے، 5 سال کے عرصے کے بعد پی آئی اے دوبارہ اس روٹ پر اپنے آپریشن شروع کرنے جا رہا ہے۔

(جاری ہے)

بتایا گیا ہے کہ طانیہ کی سول ایوی ایشن اتھارٹی نے جمعے کو پی آئی اے کے لیے غیرملکی طیاروں کا آپریٹنگ پرمٹ جاری کیا جس کے بعد برطانیہ میں پروازوں کی بحالی کے لیے آخری انتظامی رکاوٹ دور ہوئی، پی آئی اے کی واپسی سے پاکستانی تارکین وطن کے لیے سفر آسان ہونے کی توقع ہے، اس سے تجارتی روابط مضبوط ہوں گے اور آمدنی میں بھی اضافہ ہوگا کیوں کہ برطانیہ پاکستان کا تیسرا بڑا تجارتی شراکت دار ہے۔

خیال رہے کہ برطانیہ نے جولائی میں پاکستانی ایئرلائنز پر عائد پابندیاں ختم کر دی تھیں جو 2020ء میں کراچی میں پی آئی اے کے ایئربس اے 320 طیارے کے حادثے کے بعد لگائی گئی تھیں، اس حادثے میں 97 افراد کی موت واقع ہوئی تھی کیوں کہ حادثے کے بعد پائلٹ لائسنسنگ میں بے ضابطگیوں کے الزامات سامنے آئے جس کے نتیجے میں برطانیہ اور یورپی یونین دونوں نے پابندیاں عائد کردی تھیں۔