محکمہ موسمیات کی ہفتہ کی رات سے 06 اکتوبر کے دوران ملک میں موسلادھار بارش کی پیشنگوئی

ہفتہ 4 اکتوبر 2025 18:41

اسلام آباد (اُردو پوائنٹ اخبارتازہ ترین - اے پی پی۔ 04 اکتوبر2025ء) محکمہ موسمیات نے ہفتہ کی رات سے 06 اکتوبر کے دوران موسلادھار بارش کے باعث دیر، سوات، شانگلہ، بونیر، کوہستان، مانسہرہ، ایبٹ آباد، چارسدہ، نوشہرہ، صوابی، مردان، مری، گلیات، اسلام آباد/راولپنڈی اور کشمیر کے مقامی/برساتی ندی نالوں میں طغیانی کا خطرہ کا اندیشہ ظاہر کیا ہے۔

اس دوران آندھی/جھکڑ چلنے، ژالہ باری اور گرج چمک کے باعث روزمرہ کے معمولات متاثر ہونے، کمزور انفراسٹرکچر (کچے گھر/دیواریں، بجلی کے کھمبے، بل بورڈز، گاڑیاں، سولر پینل وغیرہ) کو نقصان کا اندیشہ۔مسافروں اور سیاح حضرات سفر کے دوران محتاط رہیں اور موسمی حالات کے مطابق اپنے سفر کا انتظام کریں۔محکمہ موسمیات کے مطابق آئندہ 24 گھنٹوں کے دوران ملک کےبیشترعلاقوں میں موسم خشک رہےگا ۔

(جاری ہے)

تاہم بالائی خیبر پختونخوا، کشمیر، گلگت بلتستان، اسلام آباد، بالائی پنجاب اور سندھ کے ساحلی علاقوں میں مطلع جزوی ابرآلود رہنے کے علاوہ تیز ہواؤں/آندھئ اور گرج چمک کے ساتھ چند مقامات پر بارش کا امکان ہے۔کل اتوار کو خیبر پختونخوا، کشمیر، گلگت بلتستان، اسلام آباد، پنجاب میں اکثر مقامات پر تیز ہواؤں /آندھی اور گرج چمک کے ساتھ بارش کا امکان ہے۔

اس دوران چند مقامات پر موسلادھار بارش/ ژالہ باری کی توقع ہے ملک کےدیگر علاقوں میں موسم گرم اور خشک رہنے کی توقع ہے ۔گذشتہ 24 گھنٹوں کے دوران ملک کے بیشتر علاقوں میں موسم گرم اور خشک رہا۔ تاہم بالائی خیبرپختونخوا ، بالائی پنجاب، گلگت بلتستان اورزیریں سندھ میں چند مقامات پر تیز ہواؤں اور گرج چمک کے ساتھ بارش ہوئی۔سب سے زیادہ بارش خیبرپختونخوا: پشاور ایئرپورٹ 15، پتن 14، پاراچنار 10، دیر 03، چترال 01، گلگت بلتستان: استور 04، بگروٹ 02، بونجی 01، پنجاب: منگلا 03، منڈی بہاؤالدین 02، سندھ: پڈعیدن میں 02ملی میٹر بارش ہوئی۔ ہفتہ کوریکارڈ کئے گئے زیادہ سےزیادہ درجہ حرارت : تربت 42، بہاولپور، رحیم یار خان ، بہاولنگر اور خانپور میں 39ڈگری سینٹی گریڈ ریکارڈ کیا گیا ۔