Live Updates

پی ٹی آئی بلوچستان کے زیراہتمام 7نومبر کو کوئٹہ کے ہاکی گراونڈ میں مرکزی جلسہ منعقدہوگا

بانی عمران خان کی سالگرہ کوئٹہ سمیت بلوچستان بھر میںمنائی گئی،پی ٹی آئی کے صوبائی صدرداود شاہ کاکڑ اوردیگر کی پریس کانفرنس

اتوار 5 اکتوبر 2025 19:55

کوئٹہ(اُردو پوائنٹ اخبارتازہ ترین - این این آئی۔ 05 اکتوبر2025ء) پاکستان تحریک انصاف بلوچستان کے صدر داود شاہ کاکڑ نے کہا کہ پی ٹی آئی بلوچستان کے زیراہتمام 7نومبر کو کوئٹہ کے ہاکی گراونڈ میں مرکزی جلسہ منعقدہوگا امید ہے صوبائی حکومت جلسے کے شرکاء کو مکمل سیکورٹی کی فراہمی سمیت ہمیں پرامن جلسے کی اجازت دے گی ۔یہ بات انہوں نے اتوار کو پارٹی کے رہنماوں سردار زین العابدین خلجی ، نور خان خلجی ،صدیق خان اوردیگر کے ہمراہ کوئٹہ پریس کلب میں پریس کانفرنس کرتے ہوئے کہی۔

انہوں نے کہا کہ پاکستان تحریک انصاف کے تمام ڈسٹرکٹ کے صدور کا اجلاس کوئٹہ میں منعقد ہوا جس میں اہم فیصلے کئے گئے۔انہوں نے کہا کہ پاکستان تحریک انصاف ملک کی سب سے بڑی سیاسی جماعت ہے جس نے ہمیشہ ملک کی ترقی و خوشحالی کیلئے اپنا کردارادا کیا ہے جس کی پاداش میں پارٹی کے چیئرمین گزشتہ 790دن سے بے گناہ جیل کی صعوبتیں برداشت کررہے ہیں مگر حکمران انہیں جھکانے میں ناکام رہے ہیں۔

(جاری ہے)

انہوں نے کہا کہ بانی عمران خان کی آج سالگرہ کوئٹہ سمیت بلوچستان بھر میںمنائی گئی اور کوئٹہ میں عمران خان کی صحت اورسلامتی کیلئے قرآن خوانی کا بھی اہتمام کیا گیا۔انہوں نے کہا کہ پارٹی کے ڈسٹرکٹ صدور کے اجلاس میں فیصلہ کیا گیا ہے کہ کوئٹہ میں 7نومبر بروز جمعہ سہ پہر تین بجے ہاکی گراونڈ میں مرکزی جلسہ عام منعقد ہوگا جس سے پارٹی کے مرکزی اورچاروں صوبوں کے قائدین خطاب کریں گے ۔

انہوں نے کہا کہ ہم باقاعدہ جلسے کیلئے ضلعی انتظامیہ کو درخواست دیں گے اورامید ہے کہ صوبائی حکومت نہ صرف ہمیںپرامن جلسے کی اجازت دے گی بلکہ جلسے کے شرکاء کو مکمل سیکورٹی بھی فراہم کریگی ۔انہوں نے کہا کہ پاکستان کے عوام پراسوقت فارم 47کے حکمرانوں کو مسلط کیا گیا ہے جنہوں نے اسرائیل کو تسلیم کرنے کیلئے ڈیل کرلی ہے اور جلد عوام کے سامنے یہ ڈیل آجائے گی۔انہوں نے کہا کہ اسوقت بلوچستان سمیت ملک بھر میں امن وا مان کی صورتحال انتہائی مخدوش ہے حکمران عوام کے جان و مال کے تحفظ میں بری طرح ناکام ہوچکے ہیں ۔