پاکستان کی مسلح افواج ملک کے ناقابل تسخیر دفاع کی ضمانت ہیں ،شگفتہ نورین کاظمی

پیر 6 اکتوبر 2025 14:47

مظفرآباد (اُردو پوائنٹ اخبارتازہ ترین - این این آئی۔ 06 اکتوبر2025ء) نائب صدر وممبر آرگنائزنگ کمیٹی پاکستان پیپلزپارٹی آزاد جموں وکشمیر شگفتہ نورین کاظمی نے ’’فتح-4‘‘ گراؤنڈ کروز میزائل کے کامیاب تجربے پر قوم،مسلح افواج،سائنسدانوں اور انجینئرز کو مبارکباد دی ہے۔اپنے تہنیتی پیغام میں شگفتہ نورین کاظمی نے کہا کہ ’’فتح-4‘‘ کا کامیاب تجربہ پاکستان کے دفاعی نظام کو مزید مستحکم بنانے کی جانب اہم پیش خیمہ اور ہماری عسکری صلاحیتوں اور سائنسی ترقی کا مظہر ہے۔

(جاری ہے)

انہوں نے کہا کہ اس کامیابی نے ایک بار پھر یہ ثابت کیا ہے کہ پاکستان کے انجینئرز اور سائنسدان انتہائی باصلاحیت ہیں اور ملک کے دفاع کو ناقابل تسخیر بنانے میں ان کا کردار قابل ستائش ہے۔انھوں نے کہا کہ پاکستان کی مسلح افواج ملک کے ناقابل تسخیر دفاع کی ضمانت ہیں اور قوم کو ان کی صلاحیتوں اور قربانیوں پر فخر ہے۔انہوں نے کہا کہ جدید ٹیکنالوجی میں پیش رفت ملکی دفاع کو مضبوط اور خطے میں امن واستحکام کے فروغ کا باعث بنے گی۔انھوں نے مسلح افواج، سائنسدانوں اور انجینئرز کیلئے نیک خواہشات کا اظہار کرتے ہوئے کہا کہ ان کی انتھک محنت اور عظیم قربانیاں پاکستان کے تابناک مستقبل کی ضامن ہیں۔