شدید سمندی طوفان شکتی آئندہ 24 گھنٹوں کے دوران کمزور ہو کر ڈپریشن میں تبدیل ہو جائے گا،محکمہ موسمیات

پیر 6 اکتوبر 2025 14:45

کراچی(اُردو پوائنٹ اخبارتازہ ترین - این این آئی۔ 06 اکتوبر2025ء) مغربی وسطی اور ملحقہ شمال مغربی بحیرہ عرب میں موجود شدید سمندری طوفان شکتی گزشتہ 6 گھنٹوں کے دوران کمزور ہو کر ایک سمندری طوفان میں تبدیل ہوگیا۔محکمہ موسمیات نے شمال مغربی بحیرہ عرب میں سمندری طوفان شکتی کے متعلق 11واں الرٹ جاری کر دیا ہے۔ طوفان کا مرکز کراچی سے تقریبا 910 کلومیٹر جنوب مغرب میں ہے۔

(جاری ہے)

امکان ہے کہ یہ طوفان مشرق-جنوب مشرق کی جانب اسی علاقے میں حرکت کرے گا اور آئندہ 24 گھنٹوں کے دوران کمزور ہو کر ایک دبائو(ڈپریشن)میں تبدیل ہو جائے گا۔سندھ کے ساحل کے قریب 70 سے 90 کلومیٹر فی گھنٹہ کی رفتار سے 70 تا 90 کلومیٹر فی گھنٹہ ہوائیں چلنے کے سبب سمندر میں طغیانی رہنے کا امکان ہے۔ ماہی گیروں کو مشورہ دیا جاتا ہے کہ وہ 7 اکتوبر تک گہرے سمندر میں نہ جائیں۔سائیکلون وارننگ سینٹر کراچی سمندری طوفان کی مسلسل نگرانی کر رہا ہے۔واضح رہے کہ سمندری طوفان کے سبب گزشتہ شب بھی کراچی کے مغربی، وسطی اور شمالی علاقوں میں ہلکی سے تیز بارش ہوئی تھی۔