ملک بھر میں انسداد اسمگلنگ کریک ڈائون، 84 لاکھ روپے مالیت کی منشیات ضبط

پیر 6 اکتوبر 2025 15:32

لاہور (اُردو پوائنٹ اخبارتازہ ترین - این این آئی۔ 06 اکتوبر2025ء) ملک بھر میں انسداد اسمگلنگ کریک ڈائون کے دوران 84 لاکھ روپے مالیت کی منشیات ضبط کرلی گئی۔ترجمان اینٹی نارکوٹکس فورس (اے این ایف)کے مطابق ملک کے مختلف شہروں اور تعلیمی اداروں کے اطراف منشیات فروشوں کے خلاف بھرپور آپریشن جاری ہے، اس دوران 6کارروائیوں میں 4ملزمان کو گرفتار کرکے 84لاکھ روپے سے زائد مالیت کی 83 کلوگرام منشیات برآمد کرلی گئی۔

اسلام آباد میں موٹر وے ٹول پلازہ کے قریب کارروائی کے دوران ایک گاڑی سے 300گرام آئس برآمد کی گئی جب کہ گرفتار ملزم نے اعتراف کیا کہ وہ تعلیمی اداروں کے طلبہ کو منشیات فروخت کرتا تھا۔ملتان میں واقع ایک کوریئر آفس سے اسکاٹ لینڈ سے آنے والے پارسل کی تلاشی کے دوران کریم کے ڈبوں میں چھپائی گئی 120 گرام کوکین برآمد ہوئی۔

(جاری ہے)

ادھر پشین کے علاقے میں ایک ہوٹل کے قریب گاڑی سے 65کلوگرام چرس ملی، جب کہ ملزم کو موقع پر گرفتار کرلیا گیا۔

اٹک کے قطبال ٹول پلازہ کے قریب گاڑی سے 9.6کلوگرام چرس، رنگ روڈ پشاور پر موٹر سائیکل سوار کے قبضے سے 6کلوگرام افیون اور راولپنڈی کے کوریئر آفس سے پشاور سے آنے والے پارسل سے 2.310 کلوگرام افیون برآمد کی گئی۔ترجمان کے مطابق تمام مقدمات انسداد منشیات ایکٹ 1997ء کے تحت درج کرلیے گئے ہیں اور ملزمان سے مزید تفتیش جاری ہے۔