ڈپٹی کمشنر راولپنڈی کی بارش کے بعد تمام متعلقہ محکموں کو الرٹ رہنے اور نکاسی آب کے انتظامات کو یقینی بنانے کی ہدایت

پیر 6 اکتوبر 2025 16:23

راولپنڈی (اُردو پوائنٹ اخبارتازہ ترین - اے پی پی۔ 06 اکتوبر2025ء) ڈپٹی کمشنر راولپنڈی ڈاکٹر حسن وقار چیمہ نے شہر میں ہونے والی بارش کے بعد تمام متعلقہ محکموں کو الرٹ رہنے اور نکاسی آب کے انتظامات کو یقینی بنانے کی ہدایت کی ہے۔ انہوں نے کہا کہ ضلعی انتظامیہ کے تمام افسران، واسا، راولپنڈی ویسٹ مینجمنٹ کمپنی (RWMC)، ریسکیو 1122، سول ڈیفنس اور دیگر محکمے فیلڈ میں موجود رہیں اور شہریوں کو ہر ممکن سہولت فراہم کریں۔

ڈپٹی کمشنر نے واسا حکام کو ہدایت کی کہ نکاسی آب کے تمام نالے اور راستے صاف رکھے جائیں، کسی بھی جگہ پانی کے جمع ہونے کی شکایات کا فوری ازالہ کیا جائے اور نالہ لئی پر مسلسل نگرانی رکھی جائے۔ راولپنڈی ویسٹ مینجمنٹ کمپنی کو ہدایت کی گئی کہ برساتی نالوں اور سڑکوں سے ملبہ اور کچرا ہٹا کر پانی کے بہاؤ میں رکاوٹ پیدا نہ ہونے دی جائے۔

(جاری ہے)

ریسکیو 1122 اور سول ڈیفنس کے عملے کو کسی بھی ہنگامی صورتحال کے لیے مکمل طور پر تیار رہنے اور عوامی شکایات پر فوری رسپانس دینے کی ہدایت کی گئی۔

ڈپٹی کمشنر نے تمام اسسٹنٹ کمشنرز، تحصیلداروں اور میونسپل افسران کو ہدایت کی کہ وہ فیلڈ میں موجود رہ کر نکاسی آب کے کاموں کی نگرانی کریں اور اپنے علاقوں کی صورتحال سے ضلعی کنٹرول روم کو لمحہ بہ لمحہ آگاہ کریں۔ انہوں نے کہا کہ کنٹرول روم چوبیس گھنٹے فعال رہے گا اور شہریوں کی شکایات کے ازالے کے لیے فوری اقدامات کیے جائیں گے۔ڈاکٹر حسن وقار چیمہ نے شہریوں سے اپیل کی کہ وہ غیر ضروری طور پر گھروں سے باہر نہ نکلیں، کھلے برقی تاروں، کھمبوں اور نالوں کے قریب جانے سے گریز کریں اور کسی بھی ہنگامی صورتحال میں فوراً ریسکیو 1122 یا ضلعی انتظامیہ سے رابطہ کریں۔

انہوں نے کہا کہ انتظامیہ مکمل طور پر متحرک ہے اور بارش کی صورتحال پر لمحہ بہ لمحہ نظر رکھے ہوئے ہے تاکہ شہریوں کو کسی بھی ممکنہ پریشانی سے بچایا جا سکے۔