پشاور،سردی آتے ہی خشک میوہ جات کی قیمتوں میں اضافہ، چلغوزے کی فی کلو قیمت 12ہزار روپے ہوگئی

بدھ 8 اکتوبر 2025 22:05

پشاور (اُردو پوائنٹ اخبارتازہ ترین - این این آئی۔ 08 اکتوبر2025ء) موسم سرما کی آمد کے ساتھ ہی خیبرپختونخوا کے مختلف علاقوں میں خشک میوہ جات کی قیمتوں میں اضافہ ہوگیا۔ ذرائع کے مطابق پشاور میں چلغوزے کی فی کلو قیمت 10سے 12ہزار روپے پہنچ گئی جبکہ ایک چلغوزے کی قیمت 200روپے ہوگئی ہے۔ اس کے علاوہ مونگ پھلی 600روپے سے 800روپے فی کلو، بادام 3ہزار روپے فی کلو، پستہ چار ہزار روپے فی کلو میں فروخت ہو رہا ہے۔

(جاری ہے)

موسم سرد ہونے کے بعد سب سے زیادہ خرید و فروخت مونگ پھلی کی ہو رہی ہے۔ خشک میوہ جات کی عالمی مارکیٹ میں طلب تقریبا 50 لاکھ ٹن سالانہ ہے۔پاکستان کے مختلف علاقوں سوات، چترال، گلگت بلتستان سمیت مختلف پہاڑی علاقوں سے 10لاکھ ٹن خشک میوہ جات برآمد کیا جاتا ہے۔پشاور میں زیادہ ترا مگلنگ شدہ خشک میوہ جات کی خرید و فروخت ہوتی ہے جو ایران، افغانستان اور بھارت درآمد ہوتے ہیں، خشک میوجات کے بڑے مراکز کارخانو مارکیٹ پیپلز منڈی اشرف روڈ ہیں تاہم انتظامیہ اس معاملے پر خاموش ہی رہتی ہے۔