اسلام آباد، سرکاری ادارے کے ڈائریکٹر لینڈ کو بلیو ایریا میں قتل کردیا گیا

ترجمان ایف جی ای ایچ اے نے واقعے کو ٹارگٹ کلنگ کا نتیجہ قرار دیدیا

بدھ 8 اکتوبر 2025 21:35

اسلام آباد، سرکاری ادارے کے ڈائریکٹر لینڈ کو بلیو ایریا میں قتل کردیا ..

اسلام آباد (اُردو پوائنٹ اخبارتازہ ترین - این این آئی۔ 08 اکتوبر2025ء) فیڈرل گورنمنٹ ایمپلائز ہاوسنگ اتھارٹی کے ڈائریکٹر لینڈ کو بلیو ایریا میں قتل کردیا گیا۔ذرائع کے مطابق ایف جی ای ایچ اے کے ڈائریکٹر لینڈ احسان الٰہی کو گزشتہ رات بلیوایریا میں اس وقت فائرنگ کرکے قتل کیا گیا جب وہ ہوٹل سے کھانا کھا کر باہر نکل رہے تھے، عینی شاہدین کے مطابق دو موٹر سائیکل سواروں نے احسان الٰہی کو گولیاں ماریں۔

احسان الٰہی 2024سے فیڈرل گورنمنٹ ایمپلائز ہاوسنگ اتھارٹی میں بطور ڈائریکٹر لینڈ اپنے فرائض سرانجام دے رہے تھے۔ترجمان ایف جی ای ایچ اے نے لینڈ مافیا کو قتل کا ذمہ دار قرار دیتے ہوئے کہا کہ ایف جی ای ایچ اے اپنے قابل افسر کے اس طرح قتل کی مذمت کرتا ہے، قانون نافذ کرنے والے ادارے ملزمان کو جلد از جلد گرفتار کریں۔

(جاری ہے)

وفاقی وزیر ہاوسنگ ریاض حسین پیرزادہ نے پمز اسپتال کا دورہ کرکے مقتول کے ورثا سے ملاقات کی اور اظہار ہمدردی کیا۔

وفاقی وزیر داخلہ محسن نقوی نے احسان الہی کے قتل کے واقعے کا نوٹس لیتے ہوئے آئی جی اسلام آباد پولیس سے رپورٹ طلب کرلی ہے۔محسن نقوی نے کہا کہ قتل میں ملوث ملزمان کی جلد گرفتاری یقینی بنائی جائے، مقتول کے لواحقین کو انصاف کی فراہمی میں کوئی کسر نہ چھوڑی جائے۔دریں اثنا تھانہ کوہسار پولیس نے احسان الہی کے قتل کا مقدمہ مقتول کے بھائی وقاص الٰہی کی مدعیت میں نامعلوم ملزمان کیخلاف درج کرلیا۔