وزیر ریلوے ٹرینوں کی تاخیر پر برہم، اوقات کار 10دن میں معمول پر لانے کا الٹی میٹم

پیر 6 اکتوبر 2025 18:32

اسلام آباد/لاہور(اُردو پوائنٹ اخبارتازہ ترین - این این آئی۔ 06 اکتوبر2025ء) وفاقی وزیر ریلوے محمد حنیف عباسی نے مسافر ٹرینوں کی تاخیر پر برہمی کا اظہار کرتے ہوئے ریلوے افسران کو ٹرینوں کے اوقات کار 10دن میں معمول پر لانے کا الٹی میٹم دے دیا۔وزی رریلوے محمد حنیف عباسی کی زیر صدارت اہم اجلاس ہوا جس میں ریلوے کے سینئر افسران نے آن لائن شرکت کی۔

اس موقع پر وزیرریلوے نے مسافر ٹرینوں کی تاخیر پر سخت نوٹس لیتے شدید برہمی کا اظہار کیا ۔حنیف عباسی نے تمام ڈویژنز اور ہیڈکوارٹرکو سختی سے ہدایت جاری کرتے ہوئے کہا کہ تاخیری نظام کی وجوہات دور کی جائیں۔اجلاس میں حکام کی جانب سے وزیر ریلوے کو بتایا گیا کہ تاخیر کی بڑی وجوہات پاور پلانٹس کے لیٹ آنے اور تکنیکی خرابیاں تھیں۔

(جاری ہے)

وزیر ریلوے حنیف عباسی نے کہا کہ جدیدیت اور ڈیجیٹل تبدیلی کے ساتھ ساتھ پنکچوئیلٹی یقینی بنانا اولین ترجیح ہے، مسافروں کو صاف ستھرے اسٹیشنز اور بہتر سفری سہولیات فراہم کرنا ناگزیر ہے۔

انہوں نے کہا کہ جب تک ریلوے کے مسافر وقت پر اپنی منزل تک نہیں پہنچیں گے محکمہ ریلوے مکمل طور پر بحال نہیں ہوسکتا۔حنیف عباسی نے پنکچوئیلٹی، سہولت اور شفافیت ریلوے کی نئی سمت کے عزم کا اظہار کرتے ہوئے کہا کہ ریلوے کی اپ گریڈیشن اور ڈیجیٹل تبدیلی کے ساتھ ٹرینوں کی بروقت روانگی کو یقینی بنانا اولین ترجیح ہے۔