Live Updates

کچھ لوگ پنجاب کی ترقی سے جلتے ہیں‘ جلنے والوں کے دماغ کی صفائی کر رہی ہوں، مریم نواز

ایک ٹرک پر میری تصویر لگی تھی، اس پر مٹی لگ گئی، ورکرز گلاس میں پانی لیکر پیار سے تصویر دھو رہے تھے، پیچھے ماں والا گانا لگا تھا، منظر دیکھ کر میری آنکھوں میں آنسو آ گئے؛ لاہور میں تقریب سے خطاب

ساجد علی منگل 7 اکتوبر 2025 17:26

کچھ لوگ پنجاب کی ترقی سے جلتے ہیں‘ جلنے والوں کے دماغ کی صفائی کر رہی ..

لاہور ( اُردو پوائنٹ اخبارتازہ ترین۔ 07 اکتوبر2025ء ) وزیراعلیٰ پنجاب مریم نواز کا کہنا ہے کہ ہم نے پنجاب میں کرائم کو کنٹرول کرنے کے لیے بھی اقدامات کیے، جس کی وجہ سے صورت حال میں بہتری آئی ہے ، کرائم کنٹرول ڈیپارٹمنٹ کے قیام کے بعد اب کوئی خواتین کے ساتھ زیادتی کی جرات نہیں کر سکتا لیکن کچھ لوگ پنجاب کی ترقی سے جلتے ہیں‘ جلنے والوں کے دماغ کی صفائی کر رہی ہوں، مریم نواز پنجاب کی بات نہیں کرے گی تو اور کون کرے گا؟جن کے صوبوں میں ترقی نہیں ہو رہی وہ اپنی حکومتوں سے سوال کریں، جیسا پنجاب صاف ہے ایسا سندھ، کے پی اور بلوچستان بھی صاف ہونا چاہیئے۔

لاہور مین تقریب سے خطاب کرتے ہوئے انہوں نے کہا کہ ستھرا پنجاب پروگرام 35 ہزار مشینری کے ساتھ اور ڈیڑھ لاکھ فورس کے ساتھ ایک چھتری کے نیچے ایک حکومت کے نیچے دنیا کا سب سے بڑا صفائی کا پروگرام ہے، وہ خواب آج ایک حققیت بن چکا ہے جو میں نے ایک سال قبل دیکھا تھا، ستھرا پنجاب کی جیکٹ پہننا میرے لیے اعزاز سے کم نہیں، سیلاب کے بعد ستھرا پنجاب کی ٹیم نے صوبے کو چمکا دیا ہے، راشن کارڈ کے ذریعے 3 ہزار روپے ماہانہ ستھرا پنجاب کے ورکرز کو دیئے جائیں گے۔

(جاری ہے)

وزیراعلیٰ پنجاب کا کہنا ہے کہ سیلابی صورت حال کے دوران حکومت پنجاب اور انتظامیہ نے ایک ٹیم بن کر کام کیا، ستھرا پنجاب کے ورکرز نے انسانی بند بنا کر پانی کو روکا ہوا تھا جو ایک مثال ہے، شہروں اور دیہات میں صفائی پروگرام کا آغاز مثالی ہے، یہ نہ کہنا کہ آپ کام کررہے ہیں اور میں آپ کو دیکھ نہیں رہی، یہ وردی پہن کر پیغام دیا ہے کہ ہم سب ایک ہی ہیں، اگر میں پولیس کی وردی پہن سکتی ہوں تو ستھرا پنجاب کی جیکٹ کیوں نہیں؟۔

انہوں نے کہاکہ پنجاب میں پی ٹی آئی کے دور میں تباہی آئی، ان کے دور میں سڑکوں سمیت ہر جگہ پر گندگی کے ڈھیر پڑے ہوتے تھے، گوگی اور پنکی کے دور میں صوبے میں اتنی تباہی آئی کہ پنجاب کی ہر گلی میں کچرا پڑا ہوتا تھا لیکن اب صورت حال بدل چکی ہے، پہلے قربانی کی عید کے موقع پر جگہ جگہ آلائشیں پڑی ہوتی تھیں لیکن اس بار کسی کو کہیں پر گندگی نظر نہیں آئی، اس پروگرام کے لیے متعلقہ وزیر ذیشان رفیق کو مبارکباد دیتی ہوں۔