اکتوبر2005کے زلزلہ میں عالمی برادری نے انسانی ہمدردی کے تحت مثالی کردار ادا کیا، وزیراعظم آزاد کشمیر چوہدری انوارلحق

منگل 7 اکتوبر 2025 22:10

مظفر آباد (اُردو پوائنٹ اخبارتازہ ترین - اے پی پی۔ 07 اکتوبر2025ء) وزیر اعظم آزاد حکومت ریاست جموں وکشمیر چوہدری انوارالحق نے کہا ہے کہ 8اکتوبر2005کے سانحہ میں عالمی برادری نے زلزلہ میں انسانی ہمدردی کے تحت ایک ایسا مثالی کردار ادا کیاجس نے پاکستانی قوم اور کشمیری عوام کے دل جیت لیے ، ہمیں امید نو کے ساتھ آگے بڑھنا ہوگا اور قدرتی آفات سے نمٹنے اور نقصان کو کم سے کم کرنے کیلئے آگاہی فراہم کرنا ہوگی ، جن ممالک نے اس سانحہ میں ہماری مدد کی ان کی خدمات کو ہمیشہ یاد رکھا جائیگا۔

انہوں نے کہا کہ 08اکتوبر کو آنے والے زلزلے کے بعد حکومت پاکستان اور پاکستانی قوم اس سانحہ کی تباہ کاریوں سے پیدا ہونے والے حالات سے مقابلہ کرنے کیلئے ایک ایسی زنجیر بن گئی جس کی وجہ سے ہمارے حوصلے بڑھے اور ناممکن کام ممکن ہوا۔

(جاری ہے)

شہدائے زلزلہ کی برسی کے موقع پر اپنے پیغام میں انہوں نے کہا کہ اجڑی بستیاں آبادیوں میں تبدیل ہو چکی ہیں، کھنڈرات کا منظر پیش کرنے والی سڑکوں کی جگہ شاہرات نے لے لی ہے، تعلیمی اداروں کی عمارتیں تیار ہو چکی ہیں، صحت کے شعبہ میں بیرونی ممالک کے تعاون سے ہسپتالوں اور کئی دوسرے مراکز کی تعمیر مکمل جبکہ ایسے کئی پراجیکٹ کی تعمیر عالمی معیار کے مطابق ہو رہی ہے اور جدید طبی سہولتیں اور رسل و رسائل کیلئے بین الاقوامی معیارکی شاہرات تعمیر کی گئی ہیں، عوام کو زندگی کی تمام بنیادی سہولتیں پہنچانے کیلئے اقدامات جاری ہیں، ان سب تعمیراتی سرگرمیوں میں تعمیر نو پر مامور قومی اداروں نے ایک مثالی کردار ادا کیا ہے۔

انہوں نے کہا کہ آزادکشمیر کے ہر شہر اور گاؤں میں جدید سہولیات فراہم کرینگے۔